કોલકાતા: ટેસ્ટનું વર્લ્ડ ચેમ્પિયન સાઉથ આફ્રિકા (South Africa) માત્ર અઢી દિવસની અંદર રવિવારે ભારત (india) સામે સિરીઝની પ્રથમ ટેસ્ટ જીતી જીત્યું અને ભારતની ધરતી પર તેમણે 15 વર્ષે પહેલી વાર મેળવેલા આ વિજય માટે ભારતના બૅટ્સમેનોનો ફ્લૉપ-શૉ જવાબદાર હતો એમ ચોક્કસપણે કહી શકાય, પરંતુ ધ્રુવ જુરેલની પણ એક લાપરવાહી હતી જેને લીધે તે પોતે જ પોતાનો વિક્રમીરથ અટકાવી દેવા માટે જવાબદાર કહેવાય.
ધ્રુવ જુરેલ (Dhruv Jurel) રવિવાર પહેલાં 2024માં શરૂ કરેલી ટેસ્ટ કારકિર્દીની જે સાત મૅચ રમ્યો હતો એ સાતેયમાં તેણે ભારતને જીતતું જોયું હતું અને તેનો એ રેકૉર્ડ રવિવારની હાર સાથે તૂટી ગયો છે.
બન્યું એવું કે 33 રન પર ભારતની બે જ વિકેટ પડી હતી અને 124 રનનો લક્ષ્યાંક જરાય દૂર નહોતો. એક રનના કુલ સ્કોર પર રાહુલની બીજી વિકેટ પડી હતી ત્યાર પછી વૉશિંગ્ટન સુંદર સાથે જુરેલની 32 રનની ભાગીદારી પણ થઈ હતી.
જોકે સ્પિનર સાઇમન હાર્મરના બૉલમાં જુરેલ ઉતાવળે ચોગ્ગો ફટકારવાના પ્રયાસમાં પુલ શૉટ ફટકારી બેઠો હતો અને લેગ સાઇડ પર ડીપમાં કોર્બિન બૉશ્ચે તેનો આસાન કૅચ ઝીલી લીધો હતો. ત્યાર પછી ભારતીય ટીમે એક પછી એક વિકેટ ગુમાવી હતી અને છેવટે ભારત 30 રનથી હારી ગયું હતું.
જુરેલે ગયા અઠવાડિયે બેંગ્લૂરુમાં સાઉથ આફ્રિકા-એ સામેની બિનસત્તાવાર ટેસ્ટના બંને દાવમાં સેન્ચુરી (અણનમ 132 અને અણનમ 127 રન) ફટકારી હતી એ જ પર્ફોર્મન્સ બદલ તેને કોલકાતાની ટેસ્ટમાં નીતીશ કુમાર રેડ્ડીના સ્થાને રમાડવામાં આવ્યો હતો. જોકે તેણે આ ટેસ્ટમાં નબળા પર્ફોર્મન્સ સાથે અને ખાસ કરીને બીજા દાવમાં બેદરકારીભર્યા શૉટમાં વિકેટ ગુમાવીને સાઉથ આફ્રિકાનો વિજય આસાન કરી દીધો હતો.
