મુંબઈ: દિલ્હી દેશનું પાટનગર છે અને ત્યાંની આઇપીએલની ટીમ દિલ્હી કૅપિટલ્સનો મુખ્ય કૅપ્ટન રિષભ પંત કાર-અકસ્માતના 15થી પણ વધુ મહિના બાદ પહેલી વાર મેદાન પર રમવા ઊતરશે, પરંતુ તેના તેમ જ તેની ટીમના કરોડો ચાહકોને નિરાશ કરી દે એવું ગુરુવારે કંઈક બની ગયું.
આઇપીએલનું પ્રથમ તબક્કાનું શેડ્યૂલ જાહેર થયું જેમાં 21માંથી એક પણ મૅચ દિલ્હીને નથી મળી.
22 માર્ચથી 7 એપ્રિલ સુધીના બે અઠવાડિયામાં આઇપીએલની 21 મૅચ દેશના કુલ 10 શહેરમાં રમાશે, પણ એકેય મૅચ દિલ્હીના અરુણ જેટલી સ્ટેડિયમને નથી મળી.
વાત એવી છે કે શુક્રવાર, 23મી ફેબ્રુઆરીએ શરૂ થઈ રહેલી વિમેન્સ પ્રીમિયર લીગ (ડબ્લ્યૂપીએલ)ની બીજી સીઝન શરૂ થઈ રહી છે અને એની 5 માર્ચથી 17 માર્ચની ફાઇનલ સુધીની મૅચો દિલ્હીના આ જ મેદાન પર રમાશે. હવે ડબ્લ્યૂપીએલની એકસાથે આટલી બધી મૅચો એક જ મેદાન પર રમાય તો ત્યાર પછીની સિરીઝ કે ટૂર્નામેન્ટ માટે તરત જ મેદાન તૈયાર ન પણ કરી શકાય. એ જ કારણસર મેન્સ આઇપીએલના શરૂઆતના શેડ્યૂલમાં દિલ્હી માટે એક પણ મૅચ નથી રાખવામાં આવી.
બીજું, એપ્રિલ-મેમાં લોકસભાની ચૂંટણી થવાની છે એટલે એ દૃષ્ટિએ પણ દિલ્હીમાં માહોલ ગરમ હશે એટલે પણ દિલ્હીના ગ્રાઉન્ડને હમણાં મૅચો નથી ફાળવવામાં આવી. આઇપીએલના આયોજકોએ 21 મૅચનું આંશિક શેડ્યૂલ જાહેર કરી દીધું છે જે મુજબ 22 માર્ચથી 7 એપ્રિલ દરમ્યાન જે 21 મૅચ રમાશે એની પ્રથમ મૅચ ચેન્નઈમાં ડિફેન્ડિંગ ચૅમ્પિયન ચેન્નઈ સુપર કિંગ્સ (સીએસકે) અને રૉયલ ચૅલેન્જર્સ બૅન્ગલોર (આરસીબી) વચ્ચે રમાશે જેમાં ચેન્નઈનો સુકાની મહેન્દ્રસિંહ ધોની અને બૅન્ગલોરનો કૅપ્ટન ફૅફ ડુ પ્લેસી ટૉસ માટે મેદાન પર ઊતરશે.
ફાઇનલ 26મી મેએ રમાવાની ધારણા છે. એ તારીખ અને ટી-20 વર્લ્ડ કપના આરંભની તારીખ વચ્ચે ફક્ત પાંચ દિવસનું અંતર રહેશે.
લોકસભાની ચૂંટણી આગામી એપ્રિલ-મેમાં થવાની છે અને એની તારીખ લગભગ માર્ચ મહિનાના આરંભમાં જાહેર કરવામાં આવશે.
21 દિવસના સમયપત્રક મુજબ સાત એપ્રિલ સુધી પાટનગર દિલ્હીમાં એકેય મૅચ નહીં રમાય.
22 માર્ચની પ્રથમ મૅચ રાત્રે 8.00 વાગ્યે શરૂ થશે અને પછીની મૅચો સાંજે 7.30 વાગ્યે શરૂ થશે. જે દિવસે ડબલ-હેડર (બે મૅચ) હશે એ દિવસે બપોરની મૅચ બપોરે 3.30 વાગ્યે શરૂ થશે.
મુંબઈ ઇન્ડિયન્સની પ્રથમ મૅચ રવિવાર, 24મી માર્ચે અમદાવાદમાં ગુજરાત ટાઇટન્સ સામે રમાશે. મુંબઈના વાનખેડેમાં પહેલી મૅચ પહેલી એપ્રિલે રાજસ્થાન રૉયલ્સ સામે રમાશે.
આ ટૂર્નામેન્ટમાં ચાર પ્લે-ઑફ સહિત કુલ 74 મૅચ રમાશે.
આઇપીએલ-2024નું આંશિક ટાઇમટેબલ
મૅચ વાર/તારીખ સ્થળ સમય
ચેન્નઈ-બૅન્ગલોર શુક્ર/22 માર્ચ ચેન્નઈ રાત્રે 8.00
પંજાબ-દિલ્હી શનિ/23 માર્ચ મોહાલી બપોરે 3.30
કોલકાતા-હૈદરાબાદ શનિ/23 માર્ચ કોલકાતા સાંજે 7.30
રાજસ્થાન-લખનઊ રવિ/24 માર્ચ જયપુર બપોરે 3.30
મુંબઈ-ગુજરાત રવિ/24 માર્ચ અમદાવાદ સાંજે 7.30
બૅન્ગલોર-પંજાબ સોમ/25 માર્ચ બેન્ગલૂરુ સાંજે 7.30
ગુજરાત-ચેન્નઈ મંગળ/26 માર્ચ ચેન્નઈ સાંજે 7.30
મુંબઈ/હૈદરાબાદ બુધ/27 માર્ચ હૈદરાબાદ સાંજે 7.30
રાજસ્થાન/દિલ્હી ગુરુ/28 માર્ચ જયપુર સાંજે 7.30
બૅન્ગલોર/કોલકાતા શુક્ર/29 માર્ચ બેન્ગલૂરુ સાંજે 7.30
લખનઊ-પંજાબ શનિ/30 માર્ચ લખનઊ સાંજે 7.30
ગુજરાત-હૈદરાબાદ રવિ/31 માર્ચ અમદાવાદ બપોરે 3.30
દિલ્હી-ચેન્નઈ રવિ/31 માર્ચ વિશાખાપટ્ટનમ સાંજે 7.30
મુંબઈ-રાજસ્થાન સોમ/1 એપ્રિલ મુંબઈ સાંજે 7.30
બૅન્ગલોર/લખનઊ મંગળ/2 એપ્રિલ બેન્ગલૂરુ સાંજે 7.30
દિલ્હી/કોલકાતા બુધ/3 એપ્રિલ વિશાખાપટ્ટનમ સાંજે 7.30
ગુજરાત-પંજાબ ગુરુ/4 એપ્રિલ અમદાવાદ સાંજે 7.30
હૈદરાબાદ-ચેન્નઈ શુક્ર/5 એપ્રિલ હૈદરાબાદ સાંજે 7.30
રાજસ્થાન-બૅન્ગલોર શનિ/6 એપ્રિલ જયપુર સાંજે 7.30
મુંબઈ-દિલ્હી રવિ/7 એપ્રિલ મુંબઈ બપોરે 3.30
ગુજરાત-લખનઊ રવિ/7 એપ્રિલ લખનઊ સાંજે 7.30
