‘આજે પાકિસ્તાન જ જીતવું જોઈએ, મજા આવશે’: ભારતનો ભૂતપૂર્વ બોલર કેમ આવું કહે છે?

દુબઈ/નવી દિલ્હી: આજે બપોરે 2:30 વાગ્યે દુબઈમાં શરૂ થનારી ભારત અને પાકિસ્તાન વચ્ચેની ચેમ્પિયન્સ ટ્રોફીની મૅચમાં ટીમ ઇન્ડિયા જ જીતે એવી કરોડો ભારતીય ક્રિકેટ પ્રેમીઓ આશા રાખીને બેઠાં હશે એવામાં ભારતના જ એક ભૂતપૂર્વ ફાસ્ટ બોલરે ચોંકાવનારા નિવેદનમાં કહ્યું છે કે ‘આજે તો પાકિસ્તાન જ જીતવું જોઈએ, મજા આવશે.’

1990-91 દરમ્યાન ભારત વતી ચાર ટેસ્ટ અને નવ વન-ડે રમી ચૂકેલા ભૂતપૂર્વ ફાસ્ટ બોલર અતુલ વાસને આ સનસનાટીભર્યું નિવેદન આપ્યું છે. જોકે આવું કહેવા પાછળનો તેમનો આશય જાણવા જેવો છે.

હેડ-ટુ-હેડ મુકાબલામાં કોણ ચડિયાતું?

છેલ્લા પાંચ વર્ષમાં પાકિસ્તાન સામેની વન-ડે મૅચોમાં ભારતનો રેકોર્ડ બહુ સારો છે, પરંતુ ચેમ્પિયન્સ ટ્રોફીમાં પાકિસ્તાનનો હાથ ઉપર છે. છેલ્લે 2017માં રમાયેલી ચેમ્પિયન્સ ટ્રોફીની ફાઇનલમાં પાકિસ્તાને ભારતને જ હરાવીને ટાઈટલ જીતી લીધું હતું. જોકે આજે ભારત જો પાકિસ્તાનને હરાવશે તો એ હારનો બદલો તો લીધો જ કહેવાશે, એ ઉપરાંત યજમાન પાકિસ્તાન આ ટૂર્નામેન્ટની બહાર ફેંકાઈ શકે એવી પણ પાકી સંભાવના છે.

અતુલ વાસનનો પાકિસ્તાનને સપોર્ટ કેમ?

એ.એન.આઈ.ના અહેવાલમાં મૂળ દિલ્હીના અતુલ વાસને આજના હાઈ-વૉલ્ટેજ મુકાબલા માટે પાકિસ્તાનને સપોર્ટ કેમ કર્યો એ જણાવાયું છે.

56 વર્ષીય અતુલ વાસનનું માનવું છે કે ‘આજે ભારત સામે જો પાકિસ્તાન જીતે તો જ આ ટૂર્નામેન્ટમાં ખરો રોમાંચ અને ખરી રસાકસી ટકી રહેશે.’

હરીફાઈ ટકી રહે તો જ રસ જળવાશે: વાસન

અતુલ વાસને એવું કહ્યું છે કે ‘હું તો ઇચ્છું છું કે આજે પાકિસ્તાન જ જીતે, મઝા આયેગા. આજે જો પાકિસ્તાન નહીં જીતે તો પછી બાકી શું રહ્યું? બીજી વાત એ છે કે પાકિસ્તાન જો જીતશે તો જ આ ટૂર્નામેન્ટમાં ખરી હરીફાઈ જળવાઈ રહેશે. સ્પર્ધામાં બરાબરીની હરીફાઈ હોવી જોઈએ. પાકિસ્તાન આવી મહત્વની મૅચ જીતે તો જ આ સ્પર્ધા વધુ ઇન્ટરેસ્ટિંગ બને. નહીં તો પછી આ સ્પર્ધા ઘણા લોકો રસ નહીં લે.’

આ પણ વાંચો…IND vs PAK: દુબઈની પિચ પર ટોસનું કેમ છે મહત્ત્વ, પાકિસ્તાનના આ ખેલાડી ભારતને પડી શકે છે ભારે

ભારતની ટીમને કેવી ગણાવી?

જોકે અતુલ વાસનનું એવું પણ કહેવું છે કે ‘ભારતની બૅટિંગ લાઇન-અપ ખૂબ લાંબી અને જબરદસ્ત છે. હાલમાં તમામ ટીમોમાં ભારતની ટીમ ગ્રેટેસ્ટ છે અને દુબઈમાં આક્રમણ શરૂ કરવાની બાબતમાં ભારતીય ટીમનો જે પ્લાન છે એને હું દિલથી સપોર્ટ કરું છું.’