રોહિતને બીસીસીઆઇની સલાહ, ` આક્રમક બૅટિંગ કરતો રહેજે અને આ એક વાત તો ધ્યાનમાં લેતો જ નહીં’
ક્રિકેટ બોર્ડે વિરાટ-રોહિતના ભાવિ પર બોલાવી મીટિંગઃ મહત્ત્વની યોજના પર થશે વિચારણા
નવી દિલ્હીઃ બોર્ડ ઑફ ક્નટ્રોલ ફૉર ક્રિકેટ ઇન ઇન્ડિયા (BCCI)એ કહેવાય છે કે ભૂતપૂર્વ કૅપ્ટન રોહિત શર્માને એવી સલાહ આપી છે કે તું તારી ફિટનેસ તથા પર્ફોર્મન્સ પર જ બધુ ધ્યાન આપજે અને આંતરરાષ્ટ્રીય ક્રિકેટમાં હવે તારું ભાવિ શું છે એના પર થતી અટકળ વિશે પ્રતિક્રિયા આપવાનું ટાળજે.
એક અહેવાલમાં જણાવાયું હતું કે બીસીસીઆઇના સૂત્ર પાસેથી જાણવા મળ્યા મુજબ ક્રિકેટ બોર્ડ ઇચ્છે છે કે રોહિત શર્મા વન-ડે ફૉર્મેટમાં ઓપનિંગ બૅટ્સમૅન તરીકે તેની અસલ આક્રમક સ્ટાઇલમાં રમતો રહે.
2024ની 29મી જૂને ટી-20માંથી અને 2025ની સાતમી મેએ ટેસ્ટમાં નિવૃત્તિ લઈ લેનાર રોહિત શર્મા ભારત વતી હવે ફક્ત વન-ડે રમે છે. ઑક્ટોબરમાં ઑસ્ટ્રેલિયા સામે રમાયેલી વન-ડે સિરીઝ પહેલાં રોહિતના ભાવિ વિશે ખૂબ અટકળો થતી હતી, પરંતુ પચીસમી ઑક્ટોબરે સિડનીમાં તેણે સિરીઝની ત્રીજી અને છેલ્લી વન-ડેમાં માત્ર 125 બૉલમાં ત્રણ સિક્સર અને તેર ફોરની મદદથી અણનમ 121 રનના યોગદાન સાથે તેમ જ વિરાટ કોહલી (અણનમ 74) સાથે 170 બૉલમાં બનેલી 168 રનની અતૂટ ભાગીદારીની મદદથી ભારતને વિજય અપાવ્યો હતો અને ટીમને 0-3ના વાઇટવૉશથી બચાવી લીધી હતી.
એ શ્રેણીમાં રોહિતના 202 રન તમામ બૅટ્સમેનોમાં હાઇએસ્ટ હતા અને રોહિતે મૅન ઑફ ધ મૅચ ઉપરાંત મૅન ઑફ ધ સિરીઝનો પુરસ્કાર પણ જીતી લીધો હતો. એ સાથે, વન-ડેમાંથી પણ રોહિતે નિવૃત્તિ લઈ લેવી જોઈએ એવી લોકોની વાતો બંધ થઈ ગઈ હતી.
વન-ડેમાં ભારત વતી સૌથી વધુ રન કરનારાઓમાં ત્રીજો નંબર ધરાવતો અને વન-ડે ફૉર્મેટમાં 264 રનના સર્વોચ્ચ વ્યક્તિગત સ્કોર ઉપરાંત વિક્રમજનક ત્રણ ડબલ સેન્ચુરી ફટકારનાર રોહિત (Rohit) હવે રવિવારે રાંચીમાં સાઉથ આફ્રિકા સામેની વન-ડેમાં ફરી રમતો જોવા મળશે.
એક અહેવાલ મુજબ બીસીસીઆઇના એક સૂત્રએ એવું કહ્યું છે કે ` રોહિત ટૉપ-ઑર્ડરમાં નિર્ભય થઈને બૅટિંગ કરતો રહે જે અન્યો માટે (ટીમના યુવાન ખેલાડીઓ માટે) ઉદાહરણ બની રહે. ઑસ્ટ્રેલિયામાં તે જોખમ ઉઠાવવાનું ટાળતો હોય એવું લાગ્યું હતું. જોકે બોર્ડ ઇચ્છે છે કે તેઓ બન્ને (રોહિત અને વિરાટ) બૅટિંગમાં એવી આગેવાની સંભાળે કે ટીમના પછીના યુવાન ખેલાડીઓ માટે ઇનિંગ્સ ડેવલપ કરવાનું આસાન થઈ જાય.’
એવું પણ મનાય છે કે સાઉથ આફ્રિકા સામેની વન-ડે સિરીઝ છઠ્ઠી ડિસેમ્બરે પૂરી થશે ત્યાર પછી બીસીસીઆઇ સિલેક્ટરો અને બોર્ડના મૅનેજમેન્ટ વચ્ચે મીટિંગ રાખવા માગે છે જેમાં 2027ના વન-ડે વર્લ્ડ કપને ધ્યાનમાં રાખીને જે રોડ-મૅપ તૈયાર થાય એમાં રોહિત-વિરાટનું ભાવિ શું રહેશે એના પર ચર્ચા કરવામાં આવશે.
બીસીસીઆઇના સૂત્રએ એવું કહ્યું હોવાનું મનાય છે કે ` રોહિત અને વિરાટ જેવા દિગ્ગજો પાસેથી શું અપેક્ષા રાખવામાં આવી રહી છે અને વર્તમાન મૅનેજમેન્ટ તેમની ભૂમિકાને કઈ રીતે જોઈ રહ્યા છે એ ખૂબ મહત્ત્વના મુદ્દા છે. આવા મહારથીઓએ કોઈ પ્રકારની અનિશ્ચિતતા સાથે રમતા રહેવું પડે એ ઠીક ન કહેવાય.’
આ પણ વાંચો…ધોનીએ કોહલીને પોતાના ઘરે જમાડ્યો અને પછી…
