ઓહ! કોહલીના મુદ્દે કુંબળેએ તાબડતોબ આ ખુલાસો બહાર પાડવો પડ્યો!
નવી દિલ્હી: વિરાટ કોહલી બ્રિસબેનમાં ઑસ્ટ્રેલિયા સામેની ત્રીજી ટેસ્ટના પ્રથમ દાવમાં ફક્ત ત્રણ રન બનાવીને આઉટ થઈ ગયો અને તે ફરી એકવાર વિકેટકીપર ઍલેકસ કૅરીનો શિકાર થયો એ સાથે સોશિયલ મીડિયામાં તે ટ્રૉલ થવા લાગ્યો. એટલું જ નહીં, ભૂતપૂર્વ કેપ્ટન અનિલ કુંબળેએ કોહલી વિશે આકરી ટિપ્પણી કરી હોવાનો ખોટો અહેવાલ પણ વાઇરલ થઈ ગયો જેને પગલે ખુદ કુંબળેએ તરત જ સ્પષ્ટતા કરવી પડી છે.
વાઇરલ થયેલા ફેક રિપોર્ટ મુજબ કોહલીના ખરાબ ફોર્મ વિશે કુંબળેએ એવું કહ્યું કે, ‘કોહલીના ખરાબ ફૉર્મ વિશે કેમ કોઈ કંઈ બોલતું નથી એ મને સમજાતું જ નથી. છેલ્લા પાંચ વર્ષથી ટેસ્ટ ક્રિકેટમાં કોઈ પણ બોલર માટે કોહલીની વિકેટ સાવ આસાન થઈ ગઈ છે. તેણે હવે સામાન પૅક કરીને લંડન ભેગા થઈ જવું જોઈએ.’
It has come to my attention that some social media accounts are using my image and attributing fabricated quotes to me. I want to categorically deny any association with these accounts and their content. The statements being circulated are not my views and do not reflect my…
— Anil Kumble (@anilkumble1074) December 16, 2024
જોકે અનિલ કુંબળેએ તરત જ ખુલાસો બહાર પાડીને જણાવ્યું કે, ‘ કેટલાક સોશિયલ મીડિયા એકાઉન્ટ્સ મારા ફોટા અને મારી ખોટી ટિપ્પણીઓ સાથે ખોટી પોસ્ટ વાઇરલ કરી રહ્યા છે. મેં કોહલી વિશે કંઈ જ કમેન્ટ નથી કરી અને સ્પષ્ટતા કરી દઉં છું કે આ બધા ફેક ઍકાઉન્ટ સાથે મારે કંઈ જ લેવાદેવા નથી. આ બનાવટી પોસ્ટમાં મારા નામે જે કંઈ કમેન્ટ્સ છે એ મારી નથી. હું બધાને સતર્ક કરવા માગું છું કે સોશિયલ મીડિયામાં જે કંઈ જુઓ અને જે કંઈ વાંચો એ બધું માની નહીં લેવાનું. કોઈપણ માહિતી ફૉરવર્ડ કરતાં પહેલાં એને ચકાસી લેવી જોઈએ. મારા મંતવ્યો માટે મારી સત્તાવાર સોશિયલ મીડિયા ચેનલ જ ભરોસાપાત્ર છે એવું માની લેજો.’
ઉલ્લેખનીય છે કે કોહલી જ્યારે કેપ્ટન હતો અને ત્યારે કુંબળે ટીમ ઇન્ડિયાનો હેડ-કોચ બન્યો હતો ત્યારે બન્ને વચ્ચેના સંબંધો સારા નહોતા અને કુંબળેએ એક જ વર્ષમાં કોચપદ છોડી દીધું હતું.
