સ્પોર્ટસ

અભિષેક શર્માની 12 બૉલમાં હાફ સેન્ચુરી, 16 સિક્સરના ધમાકા અને વિક્રમોની વણઝાર

હૈદરાબાદઃ ટી-20 ઇન્ટરનૅશનલના વર્લ્ડ નંબર-વન બૅટ્સમૅન અભિષેક શર્મા (148 રન, બાવન બૉલ, 16 સિક્સર, આઠ ફોર)એ અહીં ગઈ કાલે બેંગાલની ટીમ સામેની મૅચમાં ધમાકેદાર બૅટિંગ કરી હતી અને કેટલાક સિદ્ધિઓ મેળવી હતી.

ખાસ કરીને તેણે 12 બૉલમાં હાફ સેન્ચુરી પૂરી કરી હતી જે વિશ્વની મેન્સ ટી-20 ક્રિકેટમાં સંયુક્ત ત્રીજા નંબરની ફાસ્ટેસ્ટ હાફ સેન્ચુરી છે. નેપાળના દીપેન્દ્ર એઇરીએ 2023માં મોંગોલિયા સામે નવ બૉલમાં સદી ફટકારી હતી, જ્યારે ભારતના આશુતોષ શર્માએ એ જ વર્ષમાં રેલવે વતી અરુણાચલ પ્રદેશ વિરુદ્ધ 11 બૉલમાં 50 રન પૂરા કર્યા હતા અને ત્યાર પછી હવે ત્રીજા નંબરે 12 બૉલની હાફ સેન્ચુરી સાથે અભિષેક (Abhishek)નું નામ છે.

ભારતીયોમાં ટી-20માં આશુતોષ શર્મા પછી બીજા નંબરની સંયુક્ત ફાસ્ટેસ્ટ હાફ સેન્ચુરીના લિસ્ટમાં અભિષેકે યુવરાજ સિંહ સાથે પોતાનું પણ નામ લખાવ્યું છે. યુવીએ 2007માં ઇંગ્લૅન્ડ સામેની વર્લ્ડ કપની મૅચમાં છ બૉલમાં જે છ સિક્સર ફટકારી હતી એ ઇનિંગ્સમાં 12 બૉલમાં 50 રન પૂરા કર્યા હતા.

આપણ વાચો: અભિષેક શર્માએ રમી વિસ્ફોટક ઇનીગ! આ મામલે બીજો ભારતીય ક્રિકેટર બન્યો

પંજાબના 310 રનમાં 205ની ભાગીદારી

અભિષેકે આ સિદ્ધિઓ સૈયદ મુશ્તાક અલી ટ્રોફીમાં મેળવી હતી. તેણે 16 છગ્ગા અને આઠ ચોક્કાની મદદથી જે 148 રન કર્યા એની મદદથી પંજાબે 20 ઓવરમાં પાંચ વિકેટે 310 રન કર્યા હતા જેમાં બીજા ઓપનર પ્રભસિમરન સિંહ (70 રન, 35 બૉલ, ચાર સિક્સર, આઠ ફોર)નું પણ મોટું યોગદાન હતું.

અભિષેક અને પ્રભસિમરન વચ્ચે 205 રનની ઓપનિંગ પાર્ટનરશિપ થઈ હતી. પંજાબના 310 રન આ ટૂર્નામેન્ટના ઇતિહાસમાં સેકન્ડ-હાઇએસ્ટ ટોટલ હતું. બરોડા (2024માં સિક્કિમ સામે 349 રન) પહેલા સ્થાને છે.

આપણ વાચો: અભિષેક શર્માએ નંબર-વન પર રહીને જ નવો વર્લ્ડ રેકૉર્ડ રચ્યો, જાણો તેનો કરિશ્મા…

પંજાબનો 112 રનથી વિજય

પંજાબે (Punjab) આપેલા 311 રનના લક્ષ્યાંક સામે બેંગાલની ટીમ 20 ઓવરમાં નવ વિકેટે માત્ર 198 રન કરી શકી હતી અને પંજાબનો 112 રનથી વિજય થયો હતો.

શમી, આકાશ દીપની હાજરીમાં ફટકાબાજી

બેંગાલના બોલર્સમાં મોહમ્મદ શમી, આકાશ દીપ અને શાહબાઝ અહમદ જેવા જાણીતા બોલર્સ હતા અને તેમની હાજરીમાં અભિષેકે વિક્રમોના ગ્રંથમાં નામ નોંધાવ્યું હતું. તેણે 12 બૉલમાં પાંચ સિક્સર અને પાંચ ફોર સાથે 50 રન પૂરા કર્યા હતા. એ 12 બૉલમાં તેનો ફક્ત એક ડૉટ-બૉલ હતો. એ સાથે, અભિષેકે એક કૅલેન્ડર યરમાં ટી-20માં સૌથી વધુ છગ્ગા ફટકારવાનો પોતાનો જ વિક્રમ તોડી નાખ્યો હતો.

નેપાળના સાહિલનો છે વર્લ્ડ રેકૉર્ડ

ટી-20 ક્રિકેટમાં ફાસ્ટેસ્ટ સેન્ચુરી એસ્ટોનિયાના ભારતીય મૂળના ખેલાડી સાહિલ ચૌહાણના નામે છે. તેણે ગયા વર્ષે સાયપ્રસ સામે 27 બૉલમાં 100 રન પૂરા કર્યા હતા. અભિષેકે રવિવારે 32 બૉલમાં સદી પૂરી કરી હતી.

Ajay Motiwala

પત્રકારત્વ ક્ષેત્રે 35 વર્ષના અનુભવી સિનિયર પત્રકાર. 'મુંબઈ સમાચાર'માં વર્ષોથી સ્પોર્ટ્સ ક્ષેત્રે આર્ટિકલ્સ લખવા સાથે ન્યૂઝ પેપરમાં ડેઈલી સ્પોર્ટ્સ પેજ બનાવવાના અનુભવી. મુંબઈ સમાચાર સિવાય અન્ય પેપરમાં પણ કામ કર્યું છે.

સંબંધિત લેખો

Back to top button