Goldના ભાવમાં આ વર્ષે અત્યાર સુધી 26 ટકાનો બંપર વધારો, આ કારણે વધી રહ્યા છે ભાવ
મુંબઇ : સોનાના(Gold)ભાવ ત્રણ અઠવાડિયા સુધી મિશ્ર રહ્યા બાદ ગયા સપ્તાહે વધારો જોવા મળ્યો હતો. વૈશ્વિક બજારમાં સોનું 2,583 ડોલર પ્રતિ ઔંસની નવી ટોચે પહોંચ્યું હતું. જયારે કોમેક્સ પર સોનાનો ભાવ શુક્રવારે ડોલર 2,611.60 પ્રતિ ઔંસની નવી ટોચે પહોંચ્યો હતો. આ રીતે વર્ષ 2024માં અત્યાર સુધીમાં સોનાના ભાવમાં લગભગ 26 ટકાનો વધારો થયો છે. સોનાએ વળતરની દ્રષ્ટિએ ભારતીય શેરબજારના મુખ્ય સૂચકાંકો નિફ્ટી,સેન્સેક્સ અને બેન્ક નિફ્ટીને પાછળ મૂકી દીધા છે.
સોનાએ શેરબજાર કરતાં ઘણું ઊંચું વળતર આપ્યું
આ વર્ષે વૈશ્વિક સોનાના ભાવ 2,060 ડોલર થી 2,600 ડોલર પ્રતિ ઔંસ સુધી પહોંચી ગયા છે. આ 26 ટકાનો ઉછાળો છે. જ્યારે નિફ્ટી ઈન્ડેક્સે આ વર્ષે અત્યાર સુધીમાં માત્ર 16.60 ટકાની વૃદ્ધિ નોંધાવી છે. કોમોડિટી માર્કેટના નિષ્ણાતોના મતે આ સમયે સોનાના ભાવમાં વધારો થવાનું મુખ્ય કારણ યુએસ ફેડ દ્વારા રેટ કટની શક્યતા છે, જે યુએસ ડોલરના દર પર દબાણ લાવે છે.
જો કે, ભૌગોલિક રાજકીય તણાવ, ફુગાવાની ચિંતા અને બજારની અનિશ્ચિતતા એ મુખ્ય ટ્રિગર્સ છે જેણે 2024 માં પીળી ધાતુને તેના અપટ્રેન્ડને જાળવી રાખવામાં મદદ કરી છે. નિષ્ણાતોના મતે, સોનાના ભાવમાં ઝડપથી વધારો થવાની ધારણા છે અને તે ટૂંક સમયમાં 2,640 ડોલર અને 2,660 ડોલર પ્રતિ ઔંસ સુધી પહોંચશે.
સોના અને ચાંદીના સ્થાનિક ભાવ
સ્થાનિક કિંમતો વિશે વાત કરીએ તો, 4 ઓક્ટોબર, 2024ના રોજ ડિલિવરી માટેનું સોનું રૂપિયા 5 ઘટીને શુક્રવારે MCX એક્સચેન્જ પર રૂપિયા 73,510 પ્રતિ 10 ગ્રામ પર બંધ થયું હતું. તે જ સમયે, 5 ડિસેમ્બર, 2024 ના રોજ ડિલિવરી માટે ચાંદી શુક્રવારે 64 રૂપિયાના વધારા સાથે 89,244 રૂપિયા પ્રતિ કિલોગ્રામ પર બંધ થઈ.
સોનાના ભાવ કેમ વધી રહ્યા છે ?
ફેડ દ્વારા વ્યાજ દરમાં કાપની અપેક્ષાને કારણે ડોલર નબળો પડી રહ્યો છે. જેના કારણે સોનાના ભાવ વધી રહ્યા છે.
વિશ્વભરની સેન્ટ્રલ બેંકોએ તાજેતરમાં જ તેમની સોનાની ખરીદીમાં નોંધપાત્ર વધારો કર્યો છે. જેના કારણે ભાવ વધી રહ્યા છે. જ્યારે ટેકનિકલ ચાર્ટ પર પણ સોનામાં તેજીના સંકેત જોવા મળ્યા છે.યુક્રેન, મધ્ય પૂર્વ અને યુએસ-ચીન સંબંધો જેવા ભૌગોલિક રાજકીય તણાવે સોનામાં રોકાણકારોનું આકર્ષણ જાળવી રાખ્યું છે.
