પુરુષો કરતાં મહિલાઓ લોન ભરપાઈ મામલે ‘ઈમાનદાર’, એક અભ્યાસમાં બહાર આવ્યા રસપ્રદ તથ્યો

નવી દિલ્હી: દેશમાં લોન લેવાની સંખ્યામાં મહિલા ગ્રાહકોની સંખ્યામાં ભારે વધારો જોવા મળ્યો છે. આ સિવાય વધુ એક તથ્ય બહાર આવ્યું છે કે પુરુષોની સરખામણીમાં મહિલાઓ લોન ચૂકવવામાં પણ શાનદાર રેકોર્ડ સ્થાપિત કરી રહી છે. 8 માર્ચે ઉજવાતા વિશ્વ મહિલા દિવસના (Happy International Women’s Day) ના ઉપલક્ષ પર ફિનટેક પ્લેટફોર્મે એક અભ્યાસ કર્યો જેમાં રસપ્રદ આંકડા અને તથ્યો બહાર આવ્યા છે. અભ્યાસ તેવી મહિલાઓ પર કરવામાં જેને લોન લીધી હતી.

અભ્યાસના તારણમાં બહાર આવ્યું છે કે મહિલાઓ જ્યારે લોન લ્યે છે ત્યારે તે વધુ જવાબદારીઓ સાથે તેને નિભાવે છે. પુરુષો કરતાં મહિલાઓનું ક્રેડિટ બિહેવિયર પણ સારું જાણવા મળ્યું છે. મહિલાઓ સમયસર EMI ચૂકવે છે. અભ્યાસમાં એ બહાર આવ્યું છે કે લોન લેવાનું, લોનની ભરપાઈ કરવાનું એ મહિલાઓનુ ફાઈનાન્શિયલ મેનેજમેન્ટ અને કરજ પ્રત્યેની ઈમાનદારી દર્શાવે છે.

હવે જો આપણે લોન લેવાના મામલામાં બીજી એક રસપ્રદ હકીકત વિશે વાત કરીએ તો, ન્યૂ-ટુ-ક્રેડિટ (NTC)માં મહિલાઓની સંખ્યા ઝડપથી વધી છે. છેલ્લા પાંચ વર્ષમાં મહિલા ગ્રાહકોમાં લોનની માંગ બમણી થઈ ગઈ છે.

અભ્યાસ મુજબ, આ વધારો 2019 માં 18% થી વધીને 2023 માં 40% થયો. તે જ સમયે, ધિરાણ માટે નવા હતા તેવા પુરુષોમાં 22% નો ઘટાડો નોંધવામાં આવ્યો હતો. તે જ સમયે, પુરુષોમાં માંગમાં ઘટાડો પણ નોંધવામાં આવ્યો હતો. 2019 ની તુલનામાં, તે 2023 માં 82% થી ઘટીને 60% થઈ ગયું છે.

મહિલાઓ અને પુરૂષો લોન લે છે અને તેને ચૂકવે છે તે ઉપરાંત, આ અભ્યાસે અન્ય કેટલાક મહત્વપૂર્ણ મુદ્દાઓ પર પણ પ્રકાશ ફેંક્યો છે. અભ્યાસ દર્શાવે છે કે છેલ્લા પાંચ વર્ષમાં પ્રથમ વખત લોન લેનારા NTC ગ્રાહકોની ઉંમર વધી છે. એટલે કે, હવે લોકો તેમની પ્રથમ લોન 31 વર્ષની સરેરાશ ઉંમરે લે છે. 2023માં NTCની સરેરાશ ઉંમર 31 વર્ષની હતી, જ્યારે 2019માં સરેરાશ ઉંમર 26 વર્ષની હતી.