2025નું વર્ષ ખૂબ જ ગણતરીના દિવસો બાકી રહ્યા છે અને ટૂંક સમયમાં જ 2026નું વર્ષ શરૂ થઈ રહ્યું છે. આપણામાંથી અનેક લોકો દર વર્ષે નવા વર્ષની શરૂઆતમાં રિઝોલ્યુશન લઈએ અને જેમ જેમ દિવસો પસાર થાય એમ એમ એ રિઝોલ્યુશનની યાદી પણ છુમંતર થઈ જાય છે. આજે અમે અહીં તમને કેટલીક એવી વાતો વિશે જણાવવા જઈ રહ્યા છીએ કે જેને ફોલો કરીને તમે તમારું 2026નું વર્ષ સુધારી શકશો અને એક સફળતાથી ભરપૂર, સારો અને યાદગાર સમય પસાર કરી શકશો. ચાલો જોઈએ કઈ છે આ આદતો…
સવારે જલદી ઉઠોઃ
2026માં દરરોજ સવારે વહેલાં ઉઠવાનું પ્લાનિંગ કરો. રોજે 30 મિનિટ વહેલાં ઉઠવાની ટેવ પાડો, જેથી તમને તમારા રોજબરોજના કામ જેમ કે કસરત, બુક રીડિંગ વગેરે કરવા માટે પૂરતો સમય મળી રહેશે અને તમારે છેલ્લી ઘડીએ ભાગદોડ નહીં કરવી પડે.
રોજનું ટાર્ગેટ નક્કી કરોઃ
રોજબરોજના કામ કરવાની યાદી કે જેને આપણે ટુ ડુ લિસ્ટ કહીએ છીએ એ તૈયાર કરો. ટુ ડુ લિસ્ટ તૈયાર કરવાથી તમને તમારા રોજબરોજના કામ સમયસર પૂરા કરવામાં મદદ મળશે અને તમે તમારા કામમાંથી બિલકુલ નહીં ભટકો.
ફિટનેસ, કસરતને આપો પ્રાયોરિટીઃ
હેલ્થ ઈઝ વેલ્થ આપણા વડવાઓ હંમેશા આપણને કહે છે. જોકે, એના માટે જરૂરી નથી કે તમારે કોઈ મોંઘીદાટ જીમની મેમ્બરશિપ લેવી જ જોઈએ. દરરોજ તમે કસરત કે વર્કઆઉટ માટે 30 મિનિટનો સમય પણ કાઢી શકો છો. કસરત, મેડિટેશન અને યોગ તમારા માઈન્ડ અને બોડીને હેલ્ધી રાખવાામાં મદદ કરે છે.
પાણી પીવાની ટેવઃ
આપણામાંથી અનેક લોકો કામની ગડબડ કે બેક ટુ બેક મીટિંગ્સને કારણે સમય સમય પર પાણી પીવાનું ભૂલી જાય છે. આવી સ્થિતિમાં 2026માં તમે સમય સમય પર પાણી પીવાની આદત બનાવો. યોગ્ય પ્રમાણમાં પાણી પીવાથી મગજ પણ એકદમ તેજ ચાલે છે.
સતત કંઈક શીખતા રહોઃ
2026માં એક આદત ચોક્કસ તમારે પાળવી જોઈએ અને એ એટલે સતત કંઈક નવું શીખવું. દરરોજ 10થી 15 મિનીટ ફાળવો કે જેમાં તમે કંઈક નવું શીખવાનું રાખો. સતત કંઈક શીખતા રહેવું એ સફળતાની નિશાની છે.
પૈસાનો હિસાબ રાખોઃ
2026માં દર મહિનાનો હિસાબ રાખવાનું શરૂ કરો આનાથી તમને તમારા ફાઈનાન્શિયલ પ્લાનિંગ કરવામાં મદદ મળશે. તમારા પૈસા ક્યાં જઈ રહ્યા છે અને તમે ક્યાંથી પૈસા બચાવી શકો છો એ જાણી શકશો. તમારી આ આદત તમારું ફાઈનાન્શિયલ બજેટ તો બેલેન્સ રાખશે જ પણ એની સાથે સાથે તમારા બેંક બેલેન્સ પણ વધારશે.
ના કહેવાનું શીખોઃ
આપણને હંમેશાથી આપણા વડીલોએ એવું શિખવાડ્યું છે કે ક્યારેય કોઈ પણ વાત કે કામ માટે ના ના કહેવી જોઈએ. પરંતુ જ્યારે કોઈ કામ તમારા લક્ષ્ય કે ટાર્ગેટ સાથે મેળ ના ખાતા હોય તો આવી સ્થિતિમાં તમારે ના પાડવી જોઈએ. દરેક વ્યક્તિને ખુશ કરવાના ચક્કરમાં સમય ના વેડફો અને આવી સ્થિતિમાં ના પાડવાનું તમારે શીખવું પડશે.
સૂતા પહેલાંનું રૂટિન ફિક્સ કરો:
સૂવાના એક કલાક પહેલાં તમારે ફોન અને સ્ક્રીનથી દૂર રહો અને એના બદલે બુક વાંચો કે હળવું મ્યુઝિક સાંભળવાનું રાખો. આને કારણે તમારું મગજ શાંત થશે અને તમે સારી અને ગાઢ ઊંઘ માણી શકશો.
થેન્ક્યુ કહોઃ
દરરોજ રાતે બેડ પર જતાં પહેલાં આખા દિવસ દરમિયાનની 3 એવી ઘટનાઓ કે વાતો યાદ કરો, જેના માટે તમે આભારી છો. તમારે દરેક સારી વસ્તુ, વ્યક્તિ માટે થેન્કયુ કહેવું જોઈએ. આને કારણે તમે પોઝિટિવ અને ખુશ રહેશો.
