ત્રણ કલાક રહ્યું Metaનું સર્વર ડાઉન, યુઝર્સ થયા પરેશાન; મેટાએ માફી માંગી

ગત રાત્રે લગભગ 11 વાગ્યાથી, વિશ્વભરના લાખો યુઝર્સ માટે WhatsApp, Instagram અને Facebookની સેવાઓ બંધ થઈ ગઈ હતી. યુઝર્સને આ સેવાઓને ઍક્સેસ કરવામાં ઘણી સમસ્યાઓનો સામનો કરવો પડ્યો અને અન્ય પ્લેટફોર્મ પર આ સમસ્યા વિશે લખ્યું હતું. ઉલ્લેખનીય છે કે આ તમામ પ્લેટફોર્મ મેટાની માલિકીના છે, અને આવો મોટો આઉટેજ ભાગ્યે જ જોવા મળે છે.

શા કારણે થઈ સમસ્યા?
Metaના સર્વરમાં મોટી ખામીને કારણે આ તમામ પ્લેટફોર્મ અચાનક બંધ થઈ ગયા હોવાની અટકળો ફેલાઈ રહી છે. વપરાશકર્તાઓને મેસેજ મોકલવામાં, પોસ્ટ કરવામાં અથવા સ્ટોરી અપલોડ કરવામાં સમસ્યા પડી હતી. આ સમસ્યા ડેસ્કટોપ અને મોબાઈલ બંને ડિવાઇસમાં જોવા મળી હતી. શરૂઆતમાં યુઝર્સ સમજી શક્યા ન હતા કે આ કોઈ ટેક્નિકલ ખામીને કારણે છે કે પછી તેમની કનેક્ટિવિટી સંબંધિત કોઈ સમસ્યા છે.

Also read: Whatsapp યુઝર્સ માટે લાવી રહ્યું છે આ શાનદાર ફીચર, ટૂંક જ સમયમાં રોલઆઉટ કરાશે

3 કલાક રહ્યું ડાઉન
ભારતમાં લગભગ રાત્રે 11 વાગ્યાની આસપાસ Meta એપ્સમાં સમસ્યાઓની શરૂઆત થતાં યુઝર્સે ફરિયાદો કરવાની શરૂઆત કરી હતી. મળતી માહિતી મુજબ લગભગ 3 કલાક બાદ આ એપ્સ પરની સેવાઓ સામાન્ય થઈ ગઈ હતી. મેટ્રા આઉટેજનો ઉકેલ લગભગ 2 વાગ્યાની આસપાસ મળ્યો હતો. એક અહેવાલ અનુસાર એક લાખથી વધુ યુઝર્સે ફેસબુકના આઉટેજની ફરિયાદ કરી હતી. આ સિવાય ઈન્સ્ટાગ્રામને લઈને લગભગ 70 હજાર ફરિયાદો થઈ હતી. વોટ્સએપમાં પણ હજારો લોકોએ સમસ્યાની જાણ કરી હતી.

Metaની ફરિયાદ X પર
જે સમયે વોટ્સએપ, ઈન્સ્ટાગ્રામ અને ફેસબુક ડાઉન થયું, ત્યારે લોકો X પર તેની ફરિયાદ કરતા જોવા મળ્યા હતા. તેમજ આ દરમિયાન અઢળક મીમ્સ પણ શેર થયા. લોકોએ અલગ અલગ રમુજી મીમ્સ પોસ્ટ કરીને X પર આ પ્લેટફોર્મ્સ ડાઉન હોવાની ફરિયાદ કરી હતી. Metaનું સર્વર ડાઉન થયા બાદ યુઝર્સને મેસેજ મોકલવા, પોસ્ટ કરવા, સ્ટેટસ પોસ્ટ કરવા સહિત અનેક સમસ્યાઓનો સામનો કરવો પડ્યો હતો.

Metaએ માફી માંગી
Meta એપ્સને લઈને લોકોને જે સમસ્યાઓનો સામનો કરવો પડી રહ્યો છે તેને ધ્યાનમાં રાખીને, મેટાએ એક નિવેદન પણ બહાર પાડ્યું. X પર પોસ્ટ કરીને, Metaએ જણાવ્યું હતું કે કંપની તેની સેવાઓના વૈશ્વિક આઉટેજથી વાકેફ છે અને WhatsApp, Facebook અને Instagram પુનઃસ્થાપિત કરવા માટે કામ કરી રહી છે. જેઓ સમસ્યાઓનો સામનો કરી રહ્યા છે તેમની માફી.