શું તમને પણ WhatsApp પર ઈ-ચલણ મળ્યું છે? ચેતી જજો…
ઇન્ટરનેટના જમાનામાં લાઇફ જેટલી ઇઝી થઇ ગઇ છે, એટલો જ ફ્રોડ થવાનો ખતરો વધી ગયો છે. દેશ વિદેશના હેકરો ક્યારેય તમારી સાથે ઓનલાઇન ફ્રોડ કરી નાખે તે કંઇ કહેવાય નહીં. રોજ અવનવા ફ્રોડ બહાર આવતા હોય છે. તાજેતરમાં ઇ-ચલન અંગેનું એક ફ્રોડ બહાર આવ્યું છે. મળતી માહિતી મુજબ આ પ્રકારના ફ્રોડ ગુજરાત અને કર્ણાટકમાં જોવા મળ્યા છે.
શું તમને પણ WhatsApp પર ઈ-ચલણ મળ્યું છે? જો તમારે પણ વોટ્સ એપ પર ઇ-ચલન મળ્યું હોય, તો દંડ ભરવા માટે ઉતાવળ ન કરો કારણ કે તે તમારા મહેનતથી કમાયેલા નાણાંને છીનવી લેવા માટે હેકર્સ દ્વારા બિછાવેલી જાળ હોઈ શકે છે. ટોચની સાયબર સિક્યોરિટી ફર્મ CloudSEK દ્વારાહાલમાં એક અહેવાલ બહાર પાડવામાં આવ્યો છે, જેમાં આ નવી ટાઇપના ફ્રોડ વિશે માહિતી આપવામાં આવી છે અને લોકોને સાવચેત કરવામાં આવ્યા છે. હાલમાં વિયેતનામીસ હેકર ગ્રૂપના સ્કેમર્સ વોટ્સએપ પર નકલી ઈ-ચલણ સંદેશાઓ દ્વારા ભારતીય વપરાશકર્તાઓને નિશાન બનાવી રહ્યા છે.
આ સંદેશાઓ પ્રાપ્તકર્તાઓને દૂષિત એપ્લિકેશન ડાઉનલોડ કરવા માટે છેતરે છે, જે ત્યાર બાદ તેમના વ્યક્તિગત ડેટાની ચોરી કરે છે અને તેમની સાથે નાણાકીય છેતરપિંડી કરે છે.
આ સ્કેમર્સ પરિવહન સેવા અથવા કર્ણાટક પોલીસના હોવાનો ઢોંગ કરીને સંદેશાઓ મોકલે છે. તેઓ નકલી ટ્રાફિક ઉલ્લંઘન દંડ જારી કરે છે. જ્યારે વપરાશકર્તાઓ આપેલી લિંક પર ક્લિક કરે છે, ત્યારે તે દૂષિત (માલવેર) APK (Android એપ્લિકેશન પેકેજ) ડાઉનલોડ કરવા માટે સંકેત આપે છે. આ એપ એકવાર ઇન્સ્ટોલ થઈ જાય પછી, સંપર્કો, ફોન કોલ્સ, SMS સંદેશાઓ અને ડિફોલ્ટ મેસેજિંગ એપ્લિકેશન બનવાની ક્ષમતા જેવી અસંખ્ય પરવાનગીઓ માટે પૂછે છે. તે વન-ટાઇમ પાસવર્ડ્સ (OTP) અને અન્ય સંવેદનશીલ સંદેશાઓને અટકાવી હેકરોને પીડિતોના ઈ-કોમર્સ એકાઉન્ટ્સને ઍક્સેસ કરવાની મંજૂરી આપે છે.
આ કૌભાંડે સમગ્ર ભારતમાં વપરાશકર્તાઓને અસર કરી છે, પણ ગુજરાતમાં આ સ્કેમના સૌથી વધુ પીડિતો જોવા મળ્યા છે, ત્યારબાદ બીજા નંબરે કર્ણાટક છે. હુમલાખોરો, વિયેતનામના બૅક ગિઆંગ પ્રાંતના હોવાનું જાણવા મળ્યું છે. તેઓ ઓળખ છુપાવવા માટે પ્રોક્સી આઈપીનો ઉપયોગ કરે છે, જેથી તેમને અને તેમની કામગીરીને શોધી કાઢવાનું મુશ્કેલ બને છે.
આવા કૌભાંડોનો ભોગ ન બનવા માટે કેટલીક વાતો ધ્યાનમાં રાખો
1) એન્ટીવાયરસ સૉફ્ટવેરનો ઉપયોગ કરો: તમારા ઉપકરણ પર પ્રતિષ્ઠિત એન્ટિવાયરસ અને એન્ટિ-માલવેર સૉફ્ટવેર ઇન્સ્ટોલ રાખો.
2) અજાણી એપ્લિકેશનને ડાઉનલોડ નહીં કરો
3) વિશ્વસનીય એપ્સ ઇન્સ્ટોલ કરો: ગૂગલ પ્લે સ્ટોર જેવા સત્તાવાર સ્ત્રોતોમાંથી જ એપ્સ ડાઉનલોડ કરો.
4) તમારી ઓપરેટિંગ સિસ્ટમ અને એપ્સ અપડેટેડ રાખો
5) તમારું બેંક એકાઉન્ટ એલર્ટ ચાલુ રાખો
6) તમારા પરિવારજનોને અને અન્યોને પણ આના વિશે માહિતી આપી જાગરૂકતા ફેલાવો
