‘અમીરોને ધ્યાનમાં રાખીને રેલવેની નીતિઓ બનાવવામાં આવી રહી છે’ રાહુલ ગાંધી આવું કેમ કહ્યું

ગ્વાલિયર: કોંગ્રેસ નેતા રાહુલ ગાંધી(Rahul Gandhi)એ રવિવારે કેન્દ્ર સરકારની નીતિઓ અંગે ગંભીર સવાલો ઉભા કરી ભાજપ અને વડા પ્રધાન મોદી(PM Modi) પર આકરા પ્રહાર કર્યા હતા. તેમણે આરોપ લગાવ્યો મોદી સરકારની મોટાભાગની નીતિઓ માત્ર અમીરોને ધ્યાનમાં રાખીને બનાવવામાં આવી છે. ભારતીય રેલવે(Indian Railway)માં ભાડા વધારાને બાબતે તેમણે સરકાર પર સવાલો ઉઠાવ્યા હતા.

રાહુલ ગાંધીએ કહ્યું કે વડા પ્રધાન મોદી પરનો વિશ્વાસ એટલે છે ‘વિશ્વાસઘાત’ની ગેરંટી. રેલવે સેવાઓ સતત મોંઘી કરવામાં આવી રહી છે, જેના કારણે રેલવે ગરીબોની પહોંચની બહાર બની રહી છે. હવાઈ ચપ્પલ પહેરનારાને હવાઈજહાજમાં મુસાફરી કરાવવાનું સપનું બતાવીને વડા પ્રધાન મોદી ‘ગરીબોની સવારી’ રેલ્વેથી પણ ગરીબોને દૂર કરી રહ્યા છે.

તેમણે કહ્યું કે દર વર્ષે ભાડામાં 10%નો વધારો, ડાયનેમિક ફેયરના નામે થતી લૂંટ, વધતા કેન્સલેશન ચાર્જ અને મોંઘી પ્લેટફોર્મ ટિકિટો વચ્ચે ગરીબો પગ પણ ન મૂકી શકે તેવી ‘એલાઈટ ટ્રેન'(Elite Train)ની તસવીર બતાવીને લોકોનું મનોરંજન કરવામાં આવી રહ્યું છે.

રાહુલે આગળ લખ્યું કે, વરિષ્ઠ નાગરિકો પાસેથી તેમને આપવામાં આવેલી છૂટ છીનવીને સરકારે છેલ્લા 3 વર્ષમાં ₹3,700 કરોડ એકઠા કર્યા છે. ગરીબ અને મધ્યમ વર્ગના મુસાફરોને રેલવેની પ્રાથમિકતામાંથી બાકાત રાખવામાં આવ્યા છે.

તેમણે લખ્યું કે AC કોચની સંખ્યા વધારવા માટે જનરલ કોચની સંખ્યા ઘટાડવામાં આવી રહી છે, જનરલ કોચમાં માત્ર મજૂરો અને ખેડૂતો જ નહીં પરંતુ વિદ્યાર્થીઓ અને નોકરી કરતા લોકો પણ મુસાફરી કરે છે. એસી કોચના ઉત્પાદનમાં પણ સામાન્ય કોચની સરખામણીએ 3 ગણો વધારો કરવામાં આવ્યો છે.

રેલવે બજેટને અલગથી રજૂ કરવાની પરંપરાને ખતમ કરવી એ આ કારનામાઓને છુપાવવાનું ષડયંત્ર હતું. માત્ર શ્રીમંતોને ધ્યાનમાં રાખીને રેલ્વે નીતિઓ બનાવવામાં આવી રહી છે તે ભારતની 80% વસ્તી સાથે વિશ્વાસઘાત છે. મોદી પર વિશ્વાસ એ ‘વિશ્વાસઘાતની ગેરંટી’ છે.

મધ્યપ્રદેશના ગ્વાલિયરમાં ‘ભારત જોડો ન્યાય યાત્રા’ દરમિયાન રાહુલ ગાંધીએ કહ્યું કે, આજે દેશમાં છેલ્લા 40 વર્ષમાં સૌથી વધુ બેરોજગારી છે. પાકિસ્તાનની સરખામણીએ ભારતમાં બે ગણી બેરોજગારી છે. આપની પાસે બાંગ્લાદેશ અને ભૂતાન કરતાં વધુ બેરોજગાર યુવાનો છે કારણ કે નરેન્દ્ર મોદીએ નોટબંધી અને GST લાગુ કરીને નાના ઉદ્યોગોને બરબાદ કરી દીધા છે.

રાહુલ ગાંધીએ રવિવારે સવારે ગ્વાલિયરમાં ભૂતપૂર્વ સૈનિકો અને અગ્નિવીરો સાથે વાત કરી હતી.

યાત્રા રવિવારે વિરામ લેશે કારણ કે રાહુલ ગાંધી બિહારની રાજધાની પટનામાં વિપક્ષી ભારતીય જૂથની રેલીમાં ભાગ લેશે.