ત્રણ માળના ભવ્ય રામમંદિરમાં ક્યાં બિરાજશે રામલલા, જાણો હકીકત?

અયોધ્યા: 22 જાન્યુઆરી 2024ના રોજ અયોધ્યામાં નવનિર્મિત રામ મંદિરમાં ભગવાન રામની મૂર્તિની પ્રાણ પ્રતિષ્ઠા કરવામાં આવશે. જેમ જેમ 22 જાન્યુઆરીની તારીખ નજીક આવી રહી છે તેમ તેમ રામ મંદિરના સ્વરૂપની માહિતી સામે આવી રહી છે. રામ મંદિર વિશે અત્યાર સુધી મળેલી માહિતી પરથી તેની ભવ્યતાનો અંદાજ સરળતાથી લગાવી શકાય છે.

પરંપરાગત નાગર શૈલીમાં રામ મંદિરનું નિર્માણ કરવામાં આવી રહ્યું છે. પૂર્વથી પશ્ચિમ સુધીની તેની લંબાઈ 380 ફૂટ છે, જ્યારે તેની પહોળાઈ 250 ફૂટ અને ઊંચાઈ 161 ફૂટ છે. મંદિર ત્રણ માળમાં બની રહ્યું છે જેમાં દરેક માળની ઊંચાઈ 20 ફૂટ છે. ગ્રાઉન્ડ ફ્લોર પર મંદિરના ગર્ભગૃહમાં રામલલાની મૂર્તિ બિરાજમાન થશે, જ્યારે પહેલા માળે આવેલા મંદિરના ગર્ભગૃહમાં રામ દરબાર બિરાજમાન થશે. મંદિરમાં કુલ 392 સ્તંભ અને 44 દરવાજા હશે. તેના થાંભલાઓ અને દિવાલોમાં દેવી-દેવતાઓની મૂર્તિઓ હશે.

મંદિરમાં કુલ પાંચ મંડપ બનાવવામાં આવી રહ્યા છે – નૃત્ય મંડપ, રંગ મંડપ, ગુઢ અથવા સભા મંડપ, પ્રાર્થના મંડપ અને કીર્તન મંડપ. તેનું પ્રવેશદ્વાર પૂર્વ તરફથી હશે, જેનું નામ સિંહદ્વાર હશે અને જેની ઊંચાઈ 16.5 ફૂટ હશે. મંદિરના ચારેય ખૂણામાં ભગવાન સૂર્ય, શંકર, ગણપતિ અને ભગવતીના મંદિરો બનાવવામાં આવી રહ્યા છે. તેના દક્ષિણ ભાગમાં હનુમાનજી અને અન્નપૂર્ણા દેવીનું મંદિર પણ બનાવવામાં આવી રહ્યું છે. મંદિરમાં પૌરાણિક સીતાકૂપ પણ ઉપસ્થિત રહેશે.

આ ઉપરાંત મહર્ષિ વાલ્મીકિ, મહર્ષિ વશિષ્ઠ, મહર્ષિ વિશ્વામિત્ર, મહર્ષિ અગસ્ત્ય, નિષાદરાજ, માતા શબરી અને દેવી અહિલ્યાના મંદિરો પણ બનાવાશે. મંદિરના દક્ષિણ-પશ્ચિમ ભાગમાં નવરત્ન કુબેર ટેકરા પર સ્થિત શિવ મંદિરનો જીર્ણોદ્ધાર અને રામ ભક્ત જટાયુની પ્રતિમા સ્થાપિત કરવાનો પ્રસ્તાવ પણ મુકવામાં આવ્યો છે.

22 જાન્યુઆરીએ અયોધ્યામાં એક મોટો સમારોહ થશે. દેશભરમાં તેને તહેવારની જેમ ઉજવવાની યોજના બનાવવામાં આવી રહી છે. શ્રી રામ જન્મભૂમિ તીર્થ ક્ષેત્ર વતી લોકોને એક અપીલ જારી કરવામાં આવી છે કે 22 જાન્યુઆરીએ સવારે 11 થી 1 વાગ્યાની વચ્ચે ભક્તોએ સમારોહનું ટીવી પર તેનું જીવંત પ્રસારણ જોવું. આ સમયગાળા દરમિયાન મંદિરોમાં શંખ ​​ફૂંકવા, ઘંટડીઓ વગાડવા, આરતી કરવા અને પ્રસાદ વહેંચવાની પણ અપીલ કરવામાં આવી છે.