મુંબઈ: પશ્ચિમ રેલવે મુસાફરોની સુરક્ષા અને ટ્રેન સંચાલન પર દેખરેખ રાખવા માટે એક મોટું પગલું ભર્યું છે. હવે પશ્ચિમ રેલવેની તમામ પેસેન્જર અને માલગાડીઓના ઇલેક્ટ્રિક અને ડીઝલ એન્જિનમાં હાઇ ડેફિનેશન કેમેરા લગાવવામાં આવશે.
978 એન્જિન પર 6,000 કેમેરા લગાવવામાં આવશે જેની અંદાજિત કિંમત લગભગ 100 કરોડ રૂપિયા હશે. આ કેમેરા 360 ડિગ્રી એન્ગલથી દરેક પ્રવૃત્તિ પર નજર રાખશે, જે ટ્રેકથી લઈને એન્જિનની અંદર સુધીની દરેક હિલચાલ રેકોર્ડ કરશે. આ માટેની ટેન્ડર પ્રક્રિયા ટૂંક સમયમાં શરૂ કરવામાં આવશે. માર્ચ 2026 સુધીમાં તમામ પેસેન્જર અને માલગાડીઓના એન્જિનમાં આ કેમેરા લગાવવામાં આવશે.
પશ્ચિમ રેલવે પાસે 978 એન્જિન
એક વરિષ્ઠ અધિકારીના જણાવ્યા અનુસાર પશ્ચિમ રેલવે પાસે 810 ઇલેક્ટ્રિક અને 168 ડીઝલ એન્જિન છે. આ એન્જિનોમાં બે ડ્રાઇવિંગ કેબ છે. બંને કેબની અંદર એક-એક કેમેરા લગાવવામાં આવશે. આ ઉપરાંત, ચાર કેમેરા એન્જિનની બહાર ચારેય દિશામાં લગાવવામાં આવશે.
કેમેરા 30 ડિગ્રી પર ફરશે
એક એન્જિનમાં 6 સીસીટીવી કેમેરા હશે. દરેક એન્જિનમાં સીસીટીવી સર્વેલન્સ સિસ્ટમ લગાવવામાં આવશે. આ કેમેરા હાઇ ડેફિનેશન અને હાઇ રિઝોલ્યુશનવાળા હશે, જે 360 ડિગ્રી પ્રવૃત્તિઓને કેપ્ચર કરી શકશે. આનાથી ટ્રેક, રેલવે ક્રોસિંગ અને આસપાસની દરેક પ્રવૃત્તિનું રેકોર્ડિંગ શક્ય બનશે.
અકસ્માત નિયંત્રણમાં મદદ મળશે
આ સિસ્ટમ અકસ્માતોના કારણો શોધવામાં મદદરૂપ સાબિત થશે. આ રેકોર્ડિંગ્સ સંપૂર્ણપણે ઓફલાઇન મોડમાં હશે, તેથી હેકિંગની કોઈ શક્યતા રહેશે નહીં. એવી અપેક્ષા રાખવામાં આવે છે કે આનાથી મુસાફરોની સલામતીમાં વધારો થશે અને કોઈપણ અકસ્માત કે કટોકટીની તપાસમાં મહત્વપૂર્ણ માહિતી મળશે.
આ પણ વાંચો…પશ્ચિમ રેલવેના વડોદરા ડિવિઝનનો બ્લોક રદ, આટલી ટ્રેનનું ટાઇમ ટેબલ રહેશે યથાવત
