બિહારમાં કરૂણ દુર્ઘટના: મકાન માલિક, પત્ની અને 3 બાળકો સહિત આખા પરિવારનું છત નીચે દટાઈ જતાં મોત
પટણા: બિહારની રાજધાની પટણા નજીક દાનાપૂરમાં એક કરૂણ દુર્ઘટના સર્જાય હતી. મકાનની છત પડતા મકાન માલિક બબલૂ ખાન (ઉ. વ.32) સહિત આખા પરિવારનું મૃત્યુ થયું હતું. મૃતકોમાં તેમની પત્ની રૌશદ ખાતૂન, દીકરા મોહમ્મદ ચાંદ, દીકરી રૂકશાર અને ચાંદનીનો સમાવેશ થાય છે. દુર્ઘટના સમયે પરિવારના તમામ લોકો ઘરમાં સૂતા હતા.
સ્થાનિકોના જણાવ્યા મુજબ, રવિવારે રાત્રે 9:45 વાગ્યાની આસપાસ અચાનક ઘરની છત તૂટી પડી હતી. છત તૂટી પડવાના અવાજ સાંભળીને નજીકના વિસ્તારના લોકો ઘટનાસ્થળે દોડી આવ્યા હતા અને તાત્કાલિક બચાવ કામગીરી શરૂ કરી હતી. દુર્ઘટનાની માહિતી મળતાની સાથે જ, પોલીસનો કાફલો ઘટનસ્થળે પહોંચી ગયો હતો અને ગ્રામજનોની મદદથી કાટમાળ સાફ કરવાનું શરૂ કર્યું. જોકે, બધાને બચાવી લેવામાં આવે ત્યાં સુધીમાં પાંચેયના મૃત્યુ થઈ ગયા હતા.
ઘટનાના સમાચાર ફેલાતાં જ આખા ગામમાં શોકનું વાતાવરણ છવાઈ ગયું છે. મૃતકોના સગાસંબંધીઓ અને ગ્રામજનોમાં શોક છવાઈ ગયો છે. પોલીસે તમામ મૃતદેહોનો કબજો લઈ પોસ્ટમોર્ટમ માટે સબ-ડિવિઝનલ હોસ્પિટલમાં ખસેડયા હતા.
આ અંગે પોલીસે જણાવ્યું હતું કે, દુર્ઘટનાનું ચોક્કસ કારણ શોધવામાં આવી રહ્યું છે. પ્રારંભિક તપાસમાં જાણવા મળ્યું છે કે ઘરની છત ખૂબ જ જૂની હતી અને સતત વરસાદ અને ભેજને કારણે નબળી પડી ગઈ હતી, જેના કારણે રવિવારે રાત્રે તે અચાનક તૂટી પડી. વહીવટીતંત્રે પીડિતોના પરિવારને શક્ય તમામ સહાયની ખાતરી આપી છે.
આપણ વાંચો: વાયુ પ્રદૂષણ સામે દિલ્હીમાં નાગરિકોનો ઉગ્ર વિરોધ, સંખ્યાબંધ લોકોની અટકાયત
