કોલકાત્તાઃ કાળા કામ કરવા સમયે એક મિનિટે વિચાર ન કરતા જનપ્રતિનિધિઓ સામે કાયદાકીય કાર્યવાહી થાય ત્યારે તેમને ભારે પડી જાય છે. પશ્ચિમ બંગાળમાં એક આવી ઘટના ઘટી છે.
પશ્ચિમ બંગાળની શાળાઓમાં શિક્ષકો અને કર્મચારીઓની નિમણૂકમાં કથિત અનિયમિતતાઓને લઈને એન્ફોર્સમેન્ટ ડિરેક્ટોરેટે ટીએમસીના ધારાસભ્યના નિવાસસ્થાને દરોડા પાડ્યા હતા. અધિકારીઓના જણાવ્યા અનુસાર, દરોડાની જાણ થતાં જ વિધાનસભ્યએ પોતાના ઘરની દિવાલ કૂદીને ભાગવાનો પ્રયાસ કર્યો હતો. જોકે, અધિકારીઓએ તેમની ધરપકડ કરી હતી. વિધાનસભ્યનું નામ જિબન ક્રિષ્ણા સાહા હોવાનું જાણવા મળ્યું છે. (Jiban Krishna Saha)
આપણ વાંચો: ઈડીએ એક સાથે ત્રણ રાજ્યોના 24 સ્થળોએ દરોડા પાડ્યા! 2700 કરોડ રૂપિયાના કૌભાંડની આશંકા
ED અધિકારીના જણાવ્યા અનુસાર ધારાસભ્યને દરોડાની જાણ થતાં જ તેમણે ઘરની દિવાલ કૂદીને ભાગવાનો પ્રયાસ કર્યો હતો. ધારાસભ્યનો પીછો કરવામાં આવ્યો હતો. તેઓ દોડતા દોડતા ખેતરમાં પહોંચી ગયા હતા અને તેમને ત્યાંથી પકડી પાડવામાં આવ્યા હતા. તેમનું શરીર પણ કાદવથી ભરેલું હતું. અધિકારીએ એ પણ માહિતી આપી હતી કે ED તેમના PA ના નિવાસસ્થાને પણ દરોડા પાડી રહી છે.
ED અધિકારીએ જણાવ્યું હતું કે પુરાવાનો નાશ કરવાના પ્રયાસમાં ધારાસભ્યએ પોતાનો ફોન ઘરની નજીકના તળાવમાં ફેંકી દીધો હતો. તેમણે કહ્યું હતું કે અમારા અધિકારીઓએ તળાવમાંથી બંને મોબાઇલ ફોન કબજે કર્યા છે. બંને ફોન ફોરેન્સિક તપાસ માટે મોકલવામાં આવશે. ધારાસભ્યની પૂછપરછ કરવામાં આવી રહી છે.
આપણ વાંચો: South Korea: રાષ્ટ્રપતિની ઓફીસ પર પોલીસે દરોડા પાડ્યા, આજે મહાભિયોગ માટે મતદાન
તેમણે કહ્યું કે કથિત ભરતી કૌભાંડના સંબંધમાં બીરભૂમ જિલ્લાના એક વ્યક્તિ દ્વારા પૈસાના વ્યવહારો અંગેની માહિતીના આધારે દરોડા પાડવામાં આવ્યા હતા.
શિક્ષક ભરતી કૌભાંડ કેસમાં બુરવાનના ધારાસભ્ય સાહાની અગાઉ ધરપકડ કરવામાં આવી છે. 17 એપ્રિલ 2023 ના રોજ CBI ટીમ દ્વારા તેમની ધરપકડ કરવામાં આવી હતી. 2024 માં તેમને જામીન પર મુક્ત કરવામાં આવ્યા હતા. હાલમાં, તેઓ સુપ્રીમ કોર્ટના આદેશથી જામીન પર છે. CBI કેસના ગુનાહિત પાસાની તપાસ કરી રહી છે, જ્યારે ED મની લોન્ડરિંગ પાસા પર ધ્યાન કેન્દ્રિત કરી રહી છે.
