એક થા ટાઇગર: બજરંગ અને છોટા મટકા વચ્ચે જામ્યો જંગ, એકનું થયું મોત
ચિમૂર (ચંદ્રપૂર): બે વાઘ વચ્ચે થતાં લડાઈ વિશે તમે સાંભળ્યું હશે, ઘણી વાર ટીવીમાં આપણે આવા દ્રશ્યો જોવા મળ્યા હશે. વાઘોની વચ્ચે શિકાર માટે લડાઈ થતી જ હોય છે, પણ અહીં આ ગામ લોકોએ આવા બે વાઘને બાખડતાં નજરો નજર જોયા છે. બે વાઘની વચ્ચે શિકારને કારણે થયેલ લડાઈમાં એક વાઘનું મૃત્યુ થયું હતું, જ્યારે બીજાને ગંભીર ઇજાઓ પહોંચી છે.
આ જખમી વાઘ ઘણા સમય સુધી ઝાડીઓમાં બેસી રહ્યો હતો. તેની પણ હાલત ચિંતાજનક હોવાનું ત્યાં હાજર લોકોએ જણાવ્યું હતું. આ ઘટના મંગળવારે બપોરે બે વાગ્યાની આસપાસ ચિમુર તાલુકાના વાહાનગામના ખેડૂત સુભાષ દોડકેના ખેતરમાં બની હતી. છોટા મટકા નામના વાઘે એક બળદનો શિકાર કર્યો હતો. આ શિકાર પરથી બંને વાઘની વચ્ચે લડાઈ થઈ હશે એવી આશંકા વનવિભાગે વ્યક્ત કરી છે.
વાહાનગામના કેટલાંક લોકો બપોરે ખેતરે ગચા હતાં. ત્યારે તેમણે આ બે વાઘ વચ્ચે ફાઇટ થતી જોઇ હતી. આ લોકો તરત જ ગામની દિશામાં દોડી ગયા હતાં અને ગામ લોકોને તેમણે આ વાતની જાણકારી આપી હતી. ત્યાર બાદ આખું ગામ આ ફાઇટ જોવા ખેતરે પહોંચી ગયું હતું. જોકે ત્યાં સુધી આ બંને વાઘ વચ્ચેની લડાઈ શમી ગઈ હતી.
લોકોએ જોયું કે એક વાઘ એ જ જગ્યાએ મૃત પડ્યો હતો, જ્યારે બીજો વાઘ ઇજાગ્રસ્ત હાલતમાં જંગલની ઝાડીઓમાં બેઠો હતો. આ વાઘને જોવા માટે ગામલોકોની ભારે ભીડ ઉમટી હતી. કેટલાંક લોકોએ તો મૃત વાઘ સાથે સેલ્ફી પણ પાડી હતી. છોટા મટકા બજરંગ પર ભારે પડ્યો હોવાની ચર્ચાઓ પણ થઇ રહી હતી.
