નવી દિલ્હીઃ કફ સિરપથી બાળકોના મોત બાદ સફાળી જાગેલી સરકારે મોટો નિર્ણય કર્યો હતો. હવેથી મેડિકલ સ્ટોર પર ડોક્ટરના પ્રિસ્ક્રિપ્શન વગર કફ સિપર નહીં મળે. મેડિકલ સ્ટોર ધારકોએ પણ પ્રિસ્ક્રિપ્શનનો રેકોર્ડ રાખવો પડશે તેમજ કફ સિરફ અને ક્વોલિટી કંટ્રોલના કડક નિયમોનું પાલન કરવું પડશે.
સરકારની સરકારની ટોચની નિયમનકારી ડ્રગ કન્સલટેટેવિ કમિટી(DCC) કફ સિરપને તે શેડ્યૂલમાંથી હટાવવાની મંજૂરી આપી દીધી છે, જેની જોગવાઈઓ કફ સિરપને લાઇસન્સિંગ અને ખાસ દેખરેખના નિયમોમાંથી મુક્તિ આપતી હતી. એટલે કે, હવે તેને ખરીદવા માટે ડૉક્ટરની સલાહ અને પ્રિસ્ક્રિપ્શન ફરજિયાત રહેશે.
આ પણ વાંચો: પ્રતિબંધિત કફ સિરપની 400 બોટલ જપ્ત: એકની ધરપકડ
સૂત્રોએ જણાવ્યું કે, છેલ્લા ત્રણ વર્ષમાં ભારતમાંથી નિકાસ કરાયેલા ઘણા કફ સિરપમાં ડાય-એથિલીન ગ્લાયકોલ (DEG) અને ઇથિલીન ગ્લાયકોલ (EG) જેવા ઘાતક રસાયણો મળી આવ્યા હતા. જેના કારણે ગેમ્બિયા, ઉઝબેકિસ્તાન અને કેમરૂનમાં ઘણા બાળકોના મૃત્યુ થયા હોવાથી આ નિર્ણય લેવામાં આવ્યો હતો. તાજેતરમાં, મધ્ય પ્રદેશમાં પણ કેટલાક બાળકોનું તેના કારણે મૃત્યુ થયું હતું. સમિતિના મતે, ઉધરસ-શરદી જેવી સામાન્ય બીમારીમાં પણ લોકો જાતે દવા લેવાના બદલે ડૉક્ટરની સલાહ લે તેવો સરકારનો પ્રયાસ છે.
કેન્દ્રીય સ્વાસ્થ્ય મંત્રાલયના એક ટોચના અધિકારીએ જણાવ્યું કે બાળકોની સુરક્ષા સર્વોચ્ચ પ્રાથમિકતા છે. આનાથી ખોટી દવાઓનું સેવન અને તેની આડઅસરોને અટકાવી શકાશે. તાજેતરમાં એ હકીકત સામે આવી છે કે કેટલાક લોકો કફ સિરપનો ઉપયોગ નશા માટે કરી રહ્યા છે. વળી, ઘણા માતા-પિતા ડૉક્ટરને પૂછ્યા વિના બાળકોને સિરપ આપી રહ્યા છે, જેના પર અંકુશ લગાવવા આ નિર્ણય લેવામાં આવ્યો છે.
