પત્રકાર સામે મની લોન્ડરિંગના કેસમાં સુપ્રીમ કોર્ટે ગુજરાત સરકાર અને ઈડી પાસે માંગ્યો જવાબ
નવી દિલ્હી: સુપ્રીમ કોર્ટે ગુજરાતના પત્રકાર મહેશ લાંગાની જામીન અરજી પર ગુજરાત સરકાર અને એન્ફોર્સમેન્ટ ડિરેક્ટોરેટ (ED) પાસેથી જવાબ માંગ્યો હતો. આ કેસ એક કથિત નાણાકીય છેતરપિંડી સાથે જોડાયેલા મની લોન્ડરિંગ કેસનો છે. જસ્ટિસ સૂર્યકાંત અને જસ્ટિસ જૉયમાલ્યા બાગચીની બેન્ચે લાંગાની તે અરજી પર નોટિસ જારી કરી હતી, જેમાં ગુજરાત હાઇ કોર્ટ દ્વારા જામીનનો ઇનકાર કરવાને પડકારવામાં આવ્યો હતો.
સુનાવણી દરમિયાન સુપ્રીમ કોર્ટની બેન્ચે પત્રકારોના કાર્ય વિશે ટિપ્પણી કરતા કહ્યું, “આ કયા પ્રકારના પત્રકાર છે?” બેન્ચે, અરજદાર તરફથી ઉપસ્થિત રહેલ વરિષ્ઠ વકીલ કપિલ સિબ્બલને કહ્યું હતું કે, “અમે સન્માનપૂર્વક કહેવા માંગીએ છીએ કે કેટલાક ખૂબ જ સાચા પત્રકાર હોય છે, પરંતુ કેટલાક લોકો એવા હોય છે જેઓ કહે છે કે ‘અમે પત્રકાર છીએ’ અને ખરેખર તેઓ શું કરે છે, તે સૌ જાણે છે.”
આ ટિપ્પણીના જવાબમાં સિબ્બલે જણાવ્યું કે આ બધા માત્ર આરોપો છે. તેમણે કહ્યું કે એક FIR માં તેમને અગ્રિમ જામીન મળી ગઈ હતી, પછી બીજી FIR દાખલ થઈ, જેમાં પણ તેમને અગ્રિમ જામીન મળી ગઈ. પરંતુ હવે તેમના પર આવકવેરાની ચોરી સંબંધિત ત્રીજી FIR દાખલ થઈ છે અને તેમની સામે અન્ય આરોપો પણ લગાવવામાં આવી રહ્યા છે. આ મુદ્દે બેન્ચે નોટિસ જારી કરીને સંબંધિત અધિકારીઓ પાસેથી જવાબ માંગ્યો હતો.
ઉલ્લેખનીય છે કે, ૩૧ જુલાઈના રોજ ગુજરાત હાઇ કોર્ટે લાંગાની જામીન અરજી ફગાવી દીધી હતી. ૨૫ ફેબ્રુઆરીના રોજ ED એ જણાવ્યું હતું કે તેમણે લાંગાની કથિત નાણાકીય છેતરપિંડીથી જોડાયેલા મની લોન્ડરિંગ કેસમાં ધરપકડ કરી હતી. આ પહેલા, ઓક્ટોબર ૨૦૨૪ માં તેમને GST છેતરપિંડીના કેસમાં પ્રથમ વખત ધરપકડ કરવામાં આવી હતી. લાંગા વિરુદ્ધ મની લોન્ડરિંગનો કેસ અમદાવાદ પોલીસની બે FIR પર આધારિત છે, જેમાં છેતરપિંડી, ગુનાહિત દુરુપયોગ, વિશ્વાસઘાત, ઠગાઈ અને લાખો રૂપિયાનું ગેરકાયદે નુકસાન પહોંચાડવા જેવા આરોપો સામેલ છે.
