સુપ્રીમ કોર્ટનો કેન્દ્ર સરકારને વેધક સવાલ, પાકિસ્તાની હિન્દુ શરણાર્થીઓ નાગરિકતા આપી તો આવાસ કેમ નહી?

નવી દિલ્હી : સુપ્રીમ કોર્ટે દિલ્હીના મજનૂ કા ટીલામાં રહેતા પાકિસ્તાની હિન્દુ શરણાર્થીઓ માટે આવાસ અંગે વેધક સવાલ પૂછયો છે. કોર્ટ આ અંગે જણાવ્યું છે કે જયારે તમે આ લોકોને ભારતીય નાગરિકત્વ આપ્યું છે તો તેમને આવાસ કેમ આપવામાં નથી આવતા. આ કેસની સુનાવણી બેન્ચે આ આ શરણાર્થીઓ માટે રહેઠાણની વ્યવસ્થા અંગે ચર્ચા કરીને તેનો ઉકેલ શોધવાનો નિર્દેશ આપ્યો છે. આ વિસ્તારમાં 250 થી વધારે પરિવારો રહે છે જે બધા જ અનુસૂચિત જાતિ સમુદાયના છે.

આ પરિવારોને દૂર કરવા પર રોક લગાવવામાં આવી

આ અંગે કોર્ટમાં સુનાવણી દરમિયાન સરકારી અધિકારીઓ કોર્ટમાં જવાબ દાખલ કરવા માટે ચાર સપ્તાહનો સમય માંગ્યો હતો. જે સમયને કોર્ટે મંજુર રાખ્યો છે. તેમજ ચાર સપ્તાહ બાદ તેની સુનાવણી કરવામાં આવશે. આ દરમિયાન સુપ્રીમ કોર્ટે વચગાળાનો આદેશ આપ્યો છે. જેમાં આ વિસ્તારમાંથી આ પરિવારોને દૂર કરવા પર રોક લગાવવામાં આવી છે.

હાઈકોર્ટે શરણાર્થીઓને હટાવવાની મંજુરી આપી હતી

આ મુદ્દે લાંબી કાનૂની લડત ચાલી હતી. જેમાં 29 ઓગસ્ટ 2025ના રોજ સુપ્રીમ કોર્ટે શરણાર્થીઓને આ વિસ્તારમાંથી દુર કરવાની કાર્યવાહી પર રોક લગાવી હતી. તેમજ કેન્દ્ર સરકાર અને ડીડીએ નોટીસ આપીને જવાબ માંગ્યો હતો. આ પૂર્વે 30 મેના રોજ દિલ્હી હાઈકોર્ટે આ શરણાર્થીઓને અરજી રદ કરીને તેમને હટાવવાની મંજુરી આપી હતી. હાઈકોર્ટના આ ચુકાદા વિરુદ્ધ શરણાર્થીઓ સુપ્રીમ કોર્ટ પહોંચ્યા હતા.

સુપ્રીમ કોર્ટે માનવતાવાદી ઉકેલ શોધવાનો નિર્દેશ આપ્યો

જયારે સુપ્રીમ કોર્ટ હવે એ બાબત પર ધ્યાન કેન્દ્રિત કરી રહી છે કે જો કેન્દ્ર સરકાર આ લોકોને કાયદેસર ભારતીય નાગરિક તરીકે માન્યતા આપે છે, તો તેમને મૂળભૂત સુવિધાઓ, ખાસ કરીને રહેઠાણ કેમ આપવામાં આવી રહ્યું નથી. કોર્ટે સરકારને આને માત્ર વહીવટી બાબત જ નહીં પરંતુ માનવતાવાદી ઉકેલ શોધવાનો નિર્દેશ આપ્યો.