નવી દિલ્હી : ન્યાયતંત્રમાં કથિત ભ્રષ્ટાચાર અંગેની ચર્ચાઓ વચ્ચે લોકોનો વિશ્વાસ જાળવી રાખવા સુપ્રીમ કોર્ટના ન્યાયાધીશોએ તેમની સંપત્તિની વિગતો જાહેર કરી છે. 1 એપ્રિલના રોજ તમામ ન્યાયાધીશોની બેઠકમાં આ નિર્ણય લેવામાં આવ્યો હતો. હવે મુખ્ય ન્યાયાધીશ સંજીવ ખન્ના અને આગામી મુખ્ય ન્યાયાધીશ બી.આર. ગવઈ સહિત 33 ન્યાયાધીશોની સંપત્તિની વિગતો સુપ્રીમ કોર્ટની વેબસાઇટ પર અપલોડ કરવામાં આવી છે. ન્યાયાધીશોએ પોતાના અને તેમના પરિવારના સભ્યોના ફ્લેટ, પૂર્વજોની મિલકતો, ખેતીની જમીન, બેંક ખાતા, ઝવેરાત વગેરે વિશેની બધી માહિતી જાહેર કરી છે.
ચીફ જસ્ટિસ સંજીવ ખન્ના પાસે દક્ષિણ દિલ્હીમાં 3 બેડરૂમનો ફ્લેટ
વેબસાઈટ પર જાહેર કરેલી માહિતી મુજબ ચીફ જસ્ટિસ સંજીવ ખન્ના પાસે દક્ષિણ દિલ્હીમાં 3 બેડરૂમનો ફ્લેટ છે, દિલ્હીના કોમનવેલ્થ ગેમ્સ વિલેજમાં 2 પાર્કિંગ જગ્યાઓ સાથે 4 બેડરૂમનો ફ્લેટ છે, ગુરુગ્રામમાં એક ફ્લેટમાં 56 ટકા હિસ્સો છે. હિમાચલ પ્રદેશના ડેલહાઉસીમાં તેમનો પૈતૃક મિલકતમાં હિસ્સો છે. મુખ્ય ન્યાયાધીશે તેમના બેંક ખાતા, પીએફ ખાતા, શેર, સોનું વગેરે વિશે પણ માહિતી જાહેર કરી છે. તેમણે તેમની પત્ની અને પરિવારની મિલકત વિશે પણ માહિતી આપી છે.
જસ્ટિસ ગવઈ પાસે મુંબઈના બાંદ્રા અને દિલ્હીની ડિફેન્સ કોલોનીમાં ફ્લેટ
જ્યારે સૌથી વરિષ્ઠ ન્યાયાધીશ અને 14 મેથી મુખ્ય ન્યાયાધીશ બનવા જઈ રહેલા જસ્ટિસ ભૂષણ રામકૃષ્ણ ગવઈએ મિલકતો જાહેર કરી છે. તેમની પાસે મહારાષ્ટ્રના અમરાવતીમાં એક ઘર અને ખેતીની જમીન છે જે તેમને તેમના સ્વર્ગસ્થ પિતા પાસેથી વારસામાં મળી છે. તેમની પાસે મુંબઈના બાંદ્રા અને દિલ્હીની ડિફેન્સ કોલોનીમાં ફ્લેટ છે, તેમની પાસે નાગપુરમાં પણ ખેતીની જમીન છે. જસ્ટિસ ગવઈએ બેંક ખાતા અને સોના જેવી સંપત્તિ ઉપરાંત તેમની પત્નીની સંપત્તિ વિશે પણ માહિતી આપી છે.
લોકોનો વિશ્વાસ જાળવી રાખવા માટે આ પગલું લેવામાં આવ્યું
સુપ્રીમ કોર્ટની વેબસાઇટ પર તમામ 33 ન્યાયાધીશોની મિલકતની માહિતી ઉપલબ્ધ છે. ન્યાયતંત્રમાં ભ્રષ્ટાચાર સંબંધિત ચર્ચાઓ વચ્ચે લોકોનો વિશ્વાસ જાળવી રાખવા માટે આ પગલું લેવામાં આવ્યું હોવાનું માનવામાં આવે છે. સંપત્તિ જાહેર કરવા અંગે ન્યાયાધીશોની ફુલ કોર્ટ મીટિંગમાં પસાર કરાયેલ પ્રસ્તાવ ભવિષ્યમાં પણ લાગુ રહેશે.
આપણ વાંચો : જસ્ટિસ બીઆર ગવઈ બનશે દેશના નવા CJI, રાષ્ટ્રપતિ દ્રૌપદી મુર્મૂએ આપી મંજૂરી