આ મોંઘવારી કોઈ તો રોકો…શાકભાજી સહિતના ભાવ સીધા બમણા થયા
નવી દિલ્હી: દેશમાં એકતરફ છૂટક મોંઘવારીના દર જોઈને સામાન્ય માણસ અને સરકાર બંને પક્ષને રાહત મળી છે પરંતુ ત્યારે જથ્થાબંધ મોંઘવારીએ મોટો આંચકો આપ્યો છે. મે મહિનામાં જથ્થાબંધ ભાવ આધારીત ફુગાવા સૂચકાંક (WPI) એક મહિનામાં બમણો થઈ ગયો છે. આ દરમાં સતત ત્રીજા મહિને વધારો જોવા મળ્યો છે.
સરકારના વાણિજ્ય અને ઉદ્યોગ મંત્રાલયના જણાવ્યા અનુસાર ખાદ્ય ચીજવસ્તુઓ અને ખાસ કરીને શાકભાજી અને ઉત્પાદિત ચીજવસ્તુઓની કિંમતમાં મે મહિનામાં સતત ત્રીજા મહિનામાં જથ્થાબંધ ફુગાવો વધીને 2.61 ટકા થઈ ચૂક્યો છે. એપ્રિલ મહિનામાં જથ્થાબંધ ફુગાવા સૂચકાંક (WPI) આધારીત ફુગાવો 1.26 ટકા હતો, જ્યારે મે 2023માં માઇનસ 3.61 ટકા જેટલો નીચે રહ્યો હતો.
વાણિજ્ય અને ઉદ્યોગ મંત્રાલયના જણાવ્યા અનુસાર, મે 2024માં ફુગાવો વધવાનું મુખ્ય કારણ ખાદ્ય ચીજવસ્તુઓ, ખાદ્ય પદાર્થોનું ઉત્પાદન, ક્રૂડ પેટ્રોલિયમ અને કુદરતી ગેસ, ખનિજ તેલ, અન્ય ઉત્પાદનની કિંમતમા વધારો છે. આંકડાઓ અનુસાર, ખાદ્ય ચીજવસ્તુઓમાં ફુગાવો મે મહિનામાં 9.82 ટકા વધ્યો હતો, જ્યારે એપ્રિલમાં તે 7.74 ટકા હતો.
શાકભાજીના ભાવે બજેટ ફીકું પડ્યું:
મે મહિનામાં શાકભાજીનો મોંઘવારી દર 32.42 ટકા રહ્યો હતો, જે એપ્રિલમા 23.60 ટકા હતો. ડુંગળીનો મોંઘવારી દર 58.05 ટકા, જ્યારે બટાકાનો મોંઘવારી દર 64.05 ટકા રહ્યો હતો. તે સિવાય દાળોનો મોંઘવારી દર મે મહિનામાં 21.95 ટકા રહ્યો હતો. તો સાથે જ બળતણ અને વીજળીનો મોંઘવારી દર 1.35 ટકા રહ્યો, જો કે એપ્રિલમાં 1.38 ટકા સાથે ઘણું નીચા સ્તરે રહ્યું હતું. ઉત્પાદિત ઉત્પાદનોનો ફુગાવો 0.78 ટકા હતો, જે એપ્રિલમાં માઈનસ 0.42 ટકા હતો.
મે મહિનામાં જથ્થાબંધ ભાવ સૂચકાંકમાં વધારો એ જ મહિનાના છૂટક ફુગાવાના આંકડાથી વિપરીત છે. આ સપ્તાહની શરૂઆતમાં જારી કરાયેલા ડેટા અનુસાર, રિટેલ ફુગાવો મે મહિનામાં ઘટીને 4.75 ટકા થયો હતો, જે એક વર્ષમાં સૌથી નીચો સ્તર છે. જોકે, રાહતની વાત એ છે કે રિઝર્વ બેંક ઓફ ઈન્ડિયા (RBI) નાણાકીય નીતિ ઘડતી વખતે મુખ્યત્વે છૂટક ફુગાવાને ધ્યાનમાં રાખે છે. તમને જણાવી દઈએ કે આ મહિનાની શરૂઆતમાં RBIએ સતત આઠમી વખત વ્યાજ દર યથાવત રાખવાનો નિર્ણય લીધો હતો.