ઈન્દોરઃ સોનમ અને રાજા રઘુવંશી કેસમાં રોજ નવા નવા ખુલાસા થાય છે, પરંતુ હાલમાં શિલૉંગ પોલિસને પૂછપરછમાં જે વાત જાણવા મળી હતી તે જાણી એ સવાલ પણ થાય છે કે ખરેખર સોનમના પરિવારને રાજ કુશવાહા સાથેના તેનાં આટલા ઘનિષ્ઠ સંબંધોની જાણ ન હતી.
એક અહેવાલ અનુસાર પોલીસને પૂછપરછ સમયે એમ જાણવા મળ્યું છે કે રાજ અને સોનમે સાથે મળી એક કંપની પણ ખોલી હતી. આ કંપની રાજની માતા ચુન્ની દેવીનાં નામે ખોલવામા આવી હતી અને તેમાં લગભગ 7થી 8 લાખ રૂપિયા જમા પણ કરવામાં આવ્યા હતા. એવો શક જાહેર કરવામાં આવી રહ્યો છે કે આ પૈસા સોપારી તરીકે રાજાની હત્યા માટે ભાડેથી બોલાવેલા હત્યારાઓને આપવામાં આવ્યા હશે.
આ પણ વાંચો: જ્યારે એમપી અને મેઘાલય પોલીસ સોનમને શોધતી હતી ત્યારે આ માણસે તેને રહેવા આપ્યો હતો ફ્લેટ
પરિવારને કેમ ભનક ન પડી
સોનમનો પરિવાર પહેલેથી કહેતો આવ્યો છે કે તેમને દીકરી અને રાજના સંબંધો વિશે જાણ ન હતી. સોનમના પિતાની લાકડાની ફેક્ટરીમાં રાજ અકાઉટન્ટ તરીકે જોડાયો હતો અને બે વર્ષથી કામ કરતો હતો. સોનમ પોતાનાથી ત્રણ-ચાર વર્ષ મોટી હોવા છતાં તે સોનમના પ્રેમમાં પડ્યો હતો. સોનમના ભાઈ ગોવિંદના કહેવા અનુસાર તેને એકાદ વાર શક ગયો હતો, પરંતુ રાજ સોનમને દીદી કહેતો હતો અને બન્ને વચ્ચે આમ હોવાનું દેખાતું ન હતું. જ્યારે બીજી એક થિયરી પ્રમાણે સોનમની માતા જાણતી હતી અને સોનમની ઈચ્છા વિરુદ્ધ આ લગ્ન કરાવવામાં આવ્યા હતા. સોનમે કંઈક અજુગતું કરવાની ધમકી પણ આપી હતી, પરંતુ પરિવારને લગભગ ખ્યાલ નહીં હોય કે આવું ઘોર કૃત્ય તેમની દીકરી કરી બેસશે.
આ પણ વાંચો: રાજા રઘુવંશી હત્યાકાંડ: કેમ સોનમે રાજાની હત્યા પિસ્તોલથી ન કરી?
હવે પ્રોપર્ટીનો માલિક પણ શકના ઘેરામાં
શિલોંગ પોલીસે ગઈકાલે સોનમ જે ઘરમાં છુપાઈ હતી તે ફ્લેટના એસ્ટેટ બ્રોકર સિલોસ જેમ્સની ધરપકડ કરી છે. હવે તેની સાથેની પૂછપરછમાં એક નવું નામ બહાર આવ્યું છે. આ નામ તે ફ્લેટના માલિક લોકેન્દ્ર તોમરનું છે. લોકેન્દ્રએ સોનમનું એક બોક્સ સળગાવી દીધું હોવાનું અને પુરાવા નષ્ટ કરી દીધા હોવાનું બહાર આવ્યું હતું. સોનમે ઉપયોગમાં લીધેલી ગન વગેરે હજુ મળી નથી આ સાથે રાજાનો સોનાનો ચેઈન, મંગલસૂત્ર વગેરે પણ મળ્યા નથી. હવે લોકેન્દ્ર પાસેથી કંઈ જાણવા મળે છે કે ફરી કોઈ નવું નામ ખુલે છે તે જોવાનું રહ્યું. રાજા રઘુવંશી હત્યાકેસમાં આ આઠમું નામ ખૂલ્યું છે.
