બેંગલુરુઃ કર્ણાટક કોંગ્રેસનો વિવાદ હવે શાંત પડી રહ્યો હોય તેમ લાગે છે. હાઈકમાન્ડના આદેશ બાદ કર્ણાટકના મુખ્ય પ્રધાન સિદ્ધારમૈયાએ શુક્રવારે નાયબ મુખ્ય પ્રધાન ડીકે શિવકુમારને નાસ્તા માટે આમંત્રણ આપ્યું છે. મુખ્ય પ્રધાન નિવાસ સ્થાને બંનેની બેઠક થશે.
સિદ્ધારમૈયાએ કહ્યું, પાર્ટી હાઈકમાન્ડે મને અને ડીકે શિવકુમારને બોલાવ્યા હતા અને બેઠક કરવા કહ્યું હતું. તેથી મેં તેમને નાસ્તા માટે આમંત્રણ આપ્યું છે. જો તેઓ આવશે તો અમે ચર્ચા કરીશું. મારા વલણમાં કોઈ બદલાવ આવ્યો નથી. હું હાઈકમાન્ડની દરેક વાત માનીશ. પાર્ટી હાઈકમાન્ડ જે પણ કહેશે અમે તેનું પાલન કરીશું.
મને કોઈ ઉતાવળ નથીઃ ડીકે શિવકુમાર
જ્યારે ડીકે શિવકુમારે કહ્યું કે, નેતૃત્વ અંગેનો નિર્ણય પાર્ટી હાઈકમાન્ડ લેશે. પક્ષના કાર્યકરો આતુર હોઈ શકે છે, પરંતુ મને કોઈ ઉતાવળ નથી. પાર્ટી કોઈપણ નિર્ણય લઈ શકે છે. આ દરમિયાન મુખ્ય પ્રધાન સિદ્ધારમૈયાના પુત્ર યતીન્દ્ર સિદ્ધારમૈયાએ સ્પષ્ટ કર્યું કે, નેતૃત્વ પરિવર્તનને લઈ હાઈકમાન્ડ તરફથી કોઈ નિર્દેશ મળ્યો નથી. હાલ મુખ્ય પ્રધાન બદલવાને કોઈ નિર્ણય લેવાયો નથી.
ભાજપ હાલમાં આ વિવાદમાં ફસાવા માંગતુ નથી
ભાજપ હાલમાં સિદ્ધારમૈયા અને શિવકુમાર વચ્ચે ચાલી રહેલા વિવાદથી દુર રહેવા માંગે છે. ભાજપની રણનીતિ એવી છે કે આ મુદ્દો જેટલો લાંબો ચાલશે તેટલી જ તેમને કોંગ્રેસ વિરોધી વાતાવરણ બનાવવાની તક મળશે. ભાજપ માને છે કે કર્ણાટકનો આ વિવાદ તેમના માટે અનુકૂળ છે.
રાજસ્થાન અને છત્તીસગઢમાં ભાજપને ફાયદો થયો
ઉલ્લેખનીય છે કે, કોંગ્રેસના અન્ય એક રાજ્ય રાજસ્થાન પણ આ જ પ્રકારનો વિવાદ ઉભો થયો હતો. જેમાં અશોક ગેહલોત અને સચિન પાયલોટ વચ્ચે સીએમ પદ મુદ્દે વિવાદ સર્જાયો હતો. ભાજપે રાજસ્થાનમાં પણ થોભો અને રાહ જુઓની નીતિ અપનાવી હતી. જેનો વર્ષ 2023ની ચૂંટણીમાં રાજકીય લાભ મળ્યો હતો. છત્તીસગઢમાં, ભાજપે ભૂપેશ બઘેલ અને ટીએસ સિંહદેવના કિસ્સામાં કોઈ ઉતાવળ બતાવી નહીં અને વર્ષ 2023 માં પ્રચંડ બહુમતી સાથે સત્તામાં પરત ફર્યા.
