અમદાવાદ: ગુજરાતના વન વિભાગ દ્વારા રાજ્યના તમામ ૨૭ અભયારણ્યો અને રાષ્ટ્રીય ઉદ્યાનોને આગામી ૧૬ જૂન, ૨૦૨૫ થી ૧૫ ઓક્ટોબર, ૨૦૨૫ સુધી પ્રવાસીઓ માટે બંધ રાખવાની જાહેરાત કરવામાં આવી છે. આ નિર્ણય સસ્તન પ્રાણીઓના સંવર્ધનના સમયગાળા દરમિયાન તેમને ખલેલ ન પહોંચે તે હેતુથી લેવામાં આવ્યો છે.
ખાનગી કે સરકારી વેબસાઈટ પર ઓનલાઈન બુકિંગ બંધ કરાશે
અગ્ર મુખ્ય વન સંરક્ષક કચેરી, ગાંધીનગર દ્વારા તારીખ ૧૦ જૂન, ૨૦૨૫ ના પત્ર અનુસંધાને ગુજરાત સરકારે આ અંગેનું જાહેરનામું બહાર પાડ્યું છે. આ સમયગાળો અનેક સસ્તન પ્રાણીઓ, પક્ષીઓ અને સરીસૃપ પ્રજાતિઓ માટે પ્રજનનકાળ (સંવનન) હોય છે. આ સમયગાળા દરમિયાન પ્રવાસીઓની અવરજવરથી વન્યજીવોને થતી ખલેલ ટાળવા માટે આ પગલું ભરવામાં આવ્યું છે. 15 જુનથી અભયારણોની ખાનગી કે સરકારી વેબસાઈટ પર ઓનલાઈન બુકિંગ બંધ કરાશે, તેમજ 16 ઓક્ટોબરથી તમામ અભ્યારણ્યો અને રાષ્ટ્રીય ઉદ્યાનો પ્રવાસીઓ માટે રાબેતા મુજબ ચાલુ કરવામાં આવશે.
નળસરોવર અભયારણ્ય ૧૨૦ દિવસ માટે બંધ
આ જાહેરાત અંતર્ગત સાણંદ ખાતે આવેલું પ્રખ્યાત નળસરોવર પક્ષી અભયારણ્ય પણ ૧૨૦ દિવસ માટે પ્રવાસીઓ માટે બંધ રહેશે. ૧૬ ઓક્ટોબર, ૨૦૨૫ બાદ આ તમામ સ્થળો પર પ્રવાસીઓને ફરીથી પ્રવેશની છૂટ આપવામાં આવશે. આ નિર્ણય વન્યજીવોના સંરક્ષણ અને તેમના કુદરતી વાતાવરણમાં શાંતિપૂર્ણ રીતે પ્રજનન કરી શકે તે માટે મહત્વપૂર્ણ છે.
