સબરીમાલા સોનાની ચોરી કેસમાં ધરપકડ કરાયેલા મુખ્ય પૂજારીની તબિયત લથડી, હોસ્પિટલમાં દાખલ
સબરીમાલા : કેરળમાં સબરીમાલા સોનાની ચોરી કેસમાં ધરપકડ કરાયેલા મુખ્ય પૂજારી કંડારારુ રાજીવની તબિયત શનિવારે બગડી ગઈ હતી. તબિયત બગડતા તેમને તિરુવનંતપુરમની સરકારી મેડિકલ કોલેજ હોસ્પિટલમાં દાખલ કરવામાં આવ્યા હતા. શુક્રવારે એસઆઇટી દ્વારા ધરપકડ કરવામાં આવ્યા બાદ તેમને સ્પેશિયલ ડિસ્ટ્રિક્ટ સબ-જેલમાં રાખવામાં આવ્યા હતા.
મેડિકલ કોલેજ હોસ્પિટલમાં ખસેડવામાં આવ્યા
આ અંગે જેલના સૂત્રોના જણાવ્યા અનુસાર, શનિવારે સવારે પૂજારીએ તબિયત ખરાબ હોવાની ફરિયાદ કરી હતી. ત્યારબાદ તેમને સરકારી જનરલ હોસ્પિટલમાં લઈ જવામાં આવ્યા હતા. ડોક્ટરોની સલાહ બાદ વધુ તપાસ માટે મેડિકલ કોલેજ હોસ્પિટલમાં ખસેડવામાં આવ્યા હતા. જ્યારે ભારે પોલીસ સુરક્ષા વચ્ચે તે જનરલ હોસ્પિટલના કેઝ્યુઅલ્ટી વોર્ડમાં ચાલતા જોવા મળ્યા.
સોનાની ચોરી કેસમાં ધરપકડ
જ્યારે એસઆઈટીના રિમાન્ડ રિપોર્ટમાં લગાવવામાં આવેલા આરોપો વિશે પૂછવામાં આવ્યું ત્યારે કંદારારુ રાજીવએ કહ્યું કે તે હાલમાં આ બાબતે કોઈ ટિપ્પણી કરવા માંગતો નથી. ત્યારબાદ તેને પોલીસ વાહનમાં મેડિકલ કોલેજ લઈ જવામાં આવ્યો હતો. શુક્રવારે મુખ્ય આરોપી ઉન્નીકૃષ્ણન પોટ્ટી સાથે ગાઢ સંબંધો હોવાના આરોપમાં તેની ધરપકડ કરવામાં આવી હતી.
475 ગ્રામ સોનું ગુમ થવાના કેસમાં 11મી ધરપકડ
ઉલ્લેખનીય છે કે, આ કેસની તપાસ કરી રહેલી એસઆઈટી કેસમાં અનેક સાક્ષીઓની ઉલટ તપાસ કરી હતી. જેમાં મંદિરના કર્મચારીઓએ પણ રાજીવ વિરુદ્ધ નિવેદન આપ્યું હતું. જેનાથી ભ્રષ્ટાચાર નિવારણ કાયદા હેઠળના આરોપો વધુ મજબૂત બન્યા. એસઆઈટીના સૂત્રોએ પુષ્ટિ કરી કે રાજીવે બોર્ડના નિયમોનું ઉલ્લંઘન કરીને ચેન્નાઈ મોકલવામાં આવેલા દ્વારપાલની મૂર્તિઓ અને દરવાજાના ફ્રેમમાંથી સોનાના ઢોળવાળા પેનલ દૂર કરવાની મંજૂરી આપી હતી. આ કેસમાં એસઆઈટી દ્વારા 475 ગ્રામ સોનું ગુમ થવાના કેસમાં આ 11મી ધરપકડ છે.
