રેકોર્ડબ્રેકઃ 31 ઓક્ટોબર સુધી 7.85 કરોડ આવકવેરા રિટર્ન ફાઇલ થયા
આવકવેરા વિભાગે બુધવારે જણાવ્યું હતું કે નાણાંકીય વર્ષ 2023-24 માટે 31 ઓક્ટોબર સુધીમાં રેકોર્ડ 7.85 કરોડ આવકવેરા રિટર્ન (ITR) ફાઇલ કરવામાં આવ્યા છે. વિભાગે જણાવ્યું હતું કે નાણાકીય વર્ષ 2023-24માં 31 ઓક્ટોબર, 2023 સુધી ફાઈલ કરવામાં આવેલા આવકવેરા રિટર્નની કુલ સંખ્યા 7.85 કરોડ છે, જે અત્યાર સુધીની સૌથી વધુ હોવાનું જાણવા મળ્યું છે.
નાણાકીય વર્ષ 2022-23માં ફાઇલ કરાયેલા ITRની કુલ સંખ્યા 7.78 કરોડ હતી.
સેન્ટ્રલ બોર્ડ ઓફ ડાયરેક્ટ ટેક્સીસ ( CBDT)ના એક નિવેદન અનુસાર આ 2022 સુધીમાં ફાઈલ કરવામાં આવેલા 6.85 કરોડ ITR કરતાં 11.7 ટકા વધુ છે.
મૂલ્યાંકન વર્ષ 2023-24 માટે ફાઇલ કરાયેલ 7.65 કરોડ ITRમાંથી, 7.51 કરોડથી વધુ ITRની ચકાસણી થઈ ચૂકી છે. આ ચકાસાયેલ ITRsમાંથી, 7.19 કરોડની પ્રક્રિયા 31 ઓક્ટોબર, 2023 સુધી થઈ ચૂકી છે. આમ, લગભગ 96 ટકા ચકાસાયેલ ITR પર પ્રક્રિયા કરવામાં આવી રહી હોવાનું પણ અહેવાલ દ્વારા જાણવા મળ્યું હતું.
