અજમેર: રાજસ્થાનના અજમેરમાં (Ajmer) ખ્વાજા ગરીબ નવાઝની (Khwaja Garib Nawaz) દરગાહ નજીકનાં વિસ્તારમાં નગરપાલિકાએ ગેરકાયદે અતિક્રમણો હટાવવાની કાર્યવાહી હાથ ધરી છે. આગામી સમયમાં ખ્વાજા ગરીબ નવાઝનાં 814મા ઉર્ષ પહેલા દરગાહ વિસ્તારમાં ગેરકાયદે દબાણ હટાવવામાં આવ્યું છે. આજે સવારે અજમેર કોર્પોરેશનની ટીમે દરગાહ પોલીસ સ્ટેશન સાથે મળીને દબાણ હટાવવાની કાર્યવાહી કરી હતી.
મળતી વિગતો અનુસાર, રાજસ્થાનના અજમેર શહેરમાં ખ્વાજા ગરીબ નવાઝ દરગાહ નજીક આગામી 814મા ઉર્સ પહેલાં એક મોટી દબાણ હટાવ ઝુંબેશ હાથ ધરવામાં આવી છે. ઉર્સને ધ્યાનમાં રાખીને વિસ્તારને સ્વચ્છ અને ખુલ્લો કરવા માટે નગર નિગમની ટીમ દ્વારા આ કાર્યવાહી કરવામાં આવી હતી. કાયદો અને વ્યવસ્થા જળવાઈ રહે તે માટે સમગ્ર વિસ્તારમાં મોટી સંખ્યામાં સુરક્ષા દળો તૈનાત કરવામાં આવ્યા હતા. આ ઝુંબેશ સવારે 8 વાગ્યાની આસપાસ શરૂ કરવામાં આવી હતી.
સુરક્ષા અધિકારીઓએ આ અંગે વાત કરતાં જણાવ્યું હતું કે દબાણ હટાવવાની આ કાર્યવાહી હવે આગળ વધશે. ત્રિપોલિયા ગેટ પછી, જ્યાં પણ દબાણ હશે તેવા નિઝામ ગેટ અને દિલ્હી ગેટ તરફ પણ કાર્યવાહી કરવામાં આવશે. ઉર્સના આયોજન પૂર્વે યાત્રાળુઓ અને મુલાકાતીઓની સુવિધા તેમજ સુરક્ષાની ખાતરી કરવા માટે આ પગલું ભરવામાં આવ્યું છે, જેથી મેળા દરમિયાન કોઈ અવ્યવસ્થા ન સર્જાય.
