જમ્મુ-કાશ્મીરમાં ‘ઓપરેશન પિમ્પલ’ સફળ: કુપવાડામાં ઘૂસણખોરી નિષ્ફળ, સુરક્ષા દળોએ 2 આતંકવાદીઓને ઠાર કર્યા!
જમ્મુ: જમ્મુ અને કાશ્મીરના કુપવાડા સ્થિત કેરન સેક્ટરમાં સુરક્ષા દળોએ ઘૂસણખોરીના પ્રયાસને નિષ્ફળ બનાવ્યો છે. શનિવારે થયેલી આ કાર્યવાહીમાં બે આતંકવાદીઓ માર્યા ગયા. સેનાના ‘વ્હાઇટ ચિનાર કોર્પ્સ’ એ ‘X’ (ટ્વિટર) પર જણાવ્યું કે 7 નવેમ્બરના રોજ ગુપ્ત માહિતી મળ્યા બાદ ‘ઓપરેશન પિમ્પલ’ શરૂ કરવામાં આવ્યું હતું. ઘૂસણખોરીની કોશિશમાં લાગેલા બે આતંકવાદીઓને ઘેરી લેવામાં આવ્યા અને ત્યારબાદ કાર્યવાહીને અંજામ આપવામાં આવ્યો.
ઓપરેશન પિમ્પલ શું છે?
ઓપરેશન પિમ્પલ એ ભારતીય સશસ્ત્ર દળો દ્વારા કુપવાડાના કેરન સેક્ટરમાં શરૂ કરાયેલું સુરક્ષા અભિયાન છે. આ સંયુક્ત અભિયાન 7 નવેમ્બરના રોજ વિસ્તારમાં શંકાસ્પદ પ્રવૃત્તિ જોવા મળ્યા બાદ શરૂ કરવામાં આવ્યું હતું. જ્યારે સતર્ક સૈનિકોએ તેમને પડકાર ફેંક્યો, ત્યારે આતંકવાદીઓએ અંધાધૂંધ ગોળીબાર શરૂ કરી દીધો. આના કારણે અથડામણ શરૂ થઈ અને 2 આતંકવાદીઓ માર્યા ગયા. વિસ્તારમાં તલાશી અભિયાન હજી પણ ચાલુ છે. આ અભિયાન ચિનાર કોર દ્વારા સુરક્ષા સુનિશ્ચિત કરવા માટે ચલાવવામાં આવી રહ્યું છે.
કિશ્તવાડમાં પણ આતંકવાદીઓ સાથે અથડામણ
આ પહેલાં, જમ્મુ-કાશ્મીરના કિશ્તવાડ જિલ્લાના વન વિસ્તારમાં આતંકવાદીઓ છુપાયેલા હોવાની માહિતી મળી હતી. આતંકવાદીઓને પકડવા માટે ઘેરાબંધી કરીને સર્ચ ઓપરેશન ચલાવવામાં આવ્યું હતું. આ ઓપરેશન બુધવારે ગાઢ વન વિસ્તાર ચતરુમાં આતંકવાદીઓ અને સુરક્ષા દળો વચ્ચેની અથડામણ બાદ શરૂ થયું.
આ અથડામણમાં એક જવાન ઘાયલ થયો હતો. સુરક્ષા અધિકારીએ જણાવ્યું કે, ‘આતંકવાદીઓની શોધમાં અભિયાન ચાલુ છે. જોકે, ફરીથી ગોળીબાર થયો નથી. અભિયાનમાં ડ્રોન અને શોધક કૂતરાઓની પણ મદદ લેવામાં આવી રહી છે. ઘેરાબંધીને વધુ મજબૂત કરવા માટે વધારાના સુરક્ષા દળો તૈનાત કરવામાં આવ્યા છે.’
આ પણ વાંચો…જમ્મુ-કાશ્મીર રાજ્યસભા ચૂંટણી: ભાજપે 3 ઉમેદવાર કર્યા જાહેર, મુસ્લિમ નેતાનો પણ સમાવેશ
