Nithari Case: સુરેન્દ્ર કોલીને નિર્દોષ જાહેર કરવા સામે સુપ્રીમ કોર્ટની નોટિસ
નવી દિલ્હીઃ નોઈડાનો બહુચર્ચિત નિઠારી કાંડ ફરી એકવાર ચર્ચામાં આવ્યો છે. અલાહાબાદ હાઈકોર્ટે નિઠારી સિરિયલ કિલિંગ કેસમાં આરોપી સુરેન્દ્ર કોલીને નિર્દોષ જાહેર કર્યો હતો. યુપી સરકાર અને સેન્ટ્રલ બ્યુરો ઑફ ઇન્વેસ્ટિગેશન (CBI) એ આ નિર્ણયને પડકાર્યો હતો. આના પર સુપ્રીમ કોર્ટે સોમવારે નિઠારી સંબંધિત હત્યા કેસ પર નોટિસ જારી કરી છે. જસ્ટિસ બીઆર ગવઈ અને કેવી વિશ્વનાથનની બેન્ચે આ કેસની સુનાવણી કરવા સંમતિ આપી હતી અને હાઈકોર્ટના ચુકાદા સામે સીબીઆઈ દ્વારા દાખલ કરવામાં આવેલી અરજી પર કોલીની પ્રતિક્રિયા માંગી હતી.
ગયા વર્ષે નોઈડાના નિઠારી કાંડના બંને આરોપીઓ સુરિન્દર કોલી અને કોલીના સહયોગી મોનિન્દર સિંહ પંઢેરને અલાહાબાદ હાઈકોર્ટે પુરાવાના અભાવે નિર્દોષ જાહેર કર્યા હતા. આ બંને પર બાળકોની હત્યા અને તેમને ખાવાનો ગંભીર આરોપ હતો, જે બાદ બંનેને 17 વર્ષની જેલની સજા બાદ છોડી દેવામાં આવ્યા હતા.
આ પણ વાંચો: નિઠારી કાંડના આરોપીને નિર્દોષ જાહેર કરવા સામે CBI જશે સુપ્રીમ કોર્ટ!
વર્ષ 2006માં નોઈડાના નિઠારી ગામમાં સ્થિત પંઢેરના ડી-5 બંગલામાં અને તેની આસપાસ અનેક માનવ અવશેષો મળ્યા બાદ, નોઈડા પોલીસે બે આરોપી સુરિન્દર કોલીની અને કોલીના સહયોગી મોનિન્દર સિંહ પંઢેરની ધરપકડ કરી હતી. બંને પર હત્યાના અનેક ગુના નોંધાયા હતા. આ ભયંકર સમાચારના બીજા જ દિવસે, એક જંગલી અફવા ફેલાઈ કે બંનેએ પ્રેશર કૂકરમાં મૃતદેહોના અવશેષો રાંધ્યા અને ખાધા હતા.
અલાહાબાદ હાઈકોર્ટે સુરિન્દર કોલીને હત્યા, અપહરણ, બળાત્કાર અને પુરાવાનો નાશ કરવાના તમામ આરોપોમાંથી નિર્દોષ જાહેર કરતા કહ્યું હતું કે તેને દોષિત ઠેરવવા માટે પૂરતા પુરાવા નથી. કોલીના સહયોગી મોનિન્દર સિંહ પંઢેરને પણ 17 વર્ષ જૂના કેસમાં નિર્દોષ જાહેર કરવામાં આવ્યો હતો.