હત્યાનો આરોપી 36 વર્ષે પકડાયો, ધર્મ બદલીને વિધવા સાથે લગ્ન કરીને નવા નામ સાથે રહેતો હતો

લખનઉઃ ઉત્તર પ્રદેશમાં હત્યાનો આરોપી 36 વર્ષે પકડાયો હતો. ધર્મ બદલીને વિધવા સાથે લગ્ન કરીને તે નવા નામ સાથે રહેતો હતો. બરેલીનો 70 વર્ષીય આરોપી પ્રદીપ કુમાર સકસેના 36 વર્ષ સુધી ફરાર રહ્યા બાદ પોલીસ પકડમાં આવ્યો હતો.

શું છે મામલો

મળતી વિગત પ્રમાણે, પ્રદીપ કુમાર સક્સેના પર 1987માં હત્યા અને ચોરી મામલે વોરંટ જાહેર થયું હતું. પેરોલ પર છૂટ્યા બાદ તે ફરાર થઈ ગયો હતો અને ત્યારથી પોલીસને ચકમો આપતો રહેતો હતો. તેણે પોતાનું નામ અબ્દુલ રહીમ ઉર્ફે સક્સેના ડ્રાયવર રાખ્યું હતું. ધર્મ પણ બદલી નાંખ્યો હતો અને મુરાદાબાદમાં રહેતો હતો. તેણે એક મુસ્લિમ વિધવા સાથે લગ્ન પણ કર્યા હતા.

આ પણ વાંચો: ભરૂચના જંબુસરમાં પતિએ પત્નીની હત્યા કરી, ઝેરી દવા પી જીવન ટુકાવ્યું

બરેલી પોલીસ અનુસાર હાઈ કોર્ટે 16 ઓક્ટોબર, 2025ના રોજ પ્રદીપને ચાર સપ્તાહની અંદર હાજર કરવાનો આદેશ આપ્યો હતો. જે બાદ પોલીસે એક વિશેષ ટીમ બનાવી હતી. પોલીસે તેના પૈતૃક ગામમાં તપાસ કરી હતી. જેમાં તે 36 વર્ષ પહેલા ગાયબ થયો હોવાનું સામે આવ્યું હતું. તેના ભાઈ-ભાભીએ જણાવ્યું કે, પ્રદીપે મુસ્લિમ ધર્મ અંગીકાર કરી લીધો છે અને મુરાદાબાદમાં રહે છે. જે બાદ પોલીસે કાર્યવાહી કરીને તેને ઝડપી પાડ્યો હતો.

પોલીસ તપાસમાં ચોંકાવનારો ખુલાસો

પોલીસે કહ્યું કે, 1987માં પ્રદીપ પર કેસ થયો હતો. જેમાં તેને સજા થઈ હતી. સજા બાદ તેણે હાઈ કોર્ટમાં અપીલ કરી હતી. પેરોલ પર છૂટ્યા બાદ તે ફરાર થઈ ગયો હતો. પોલીસે જ્યારે તેની ધરપકડ કરી ત્યારે તેણે હકીકત જણાવી હતી. તેણે પોતાની ઓળખ છુપાવવા દેખાવ અને ધર્મ બદલી નાંખ્યો હતો. ઉપરાંત નામ બદલીને અબ્દુલ હમીદ રાખ્યું હતું. સરનામું પણ બદલાવી નાંખ્યું હતું. બરેલી છોડીન તે મુરાદાબાદમાં રહેતો હતો અને મુસ્લિમ વિધવા સાથે લગ્ન કરી લીધા હતા.