નવી દિલ્હી: દેશમાં IPLની ધમાકેદાર શરૂઆત થઈ ગઈ છે ત્યારે તે પૂર્વે જ કેન્દ્ર સરકારે એક મોટી કાર્યવાહી કરી છે. કેન્દ્ર સરકારે 300 થી વધુ ગેરકાયદેસર વિદેશી ઓનલાઈન મની ગેમિંગ પ્લેટફોર્મને બ્લોક કરી દીધા છે. આ અંગે કેન્દ્ર સરકારે શનિવારે માહિતી આપી હતી. આ વેબસાઇટ્સ વિદેશથી ચાલતી ઓનલાઇન ગેમિંગ એપ્સ સાથે જોડાયેલી હતી.
આ પણ વાંચો: ઓનલાઈન ગેમિંગ ખેલ ખતરનાક
357 વેબસાઇટ્સ અને URL બ્લોક
ગુડ્સ એન્ડ સર્વિસીસ ટેક્સ ઇન્ટેલિજન્સ ડિરેક્ટોરેટ જનરલ (DGGI) આ વિદેશી ઓનલાઈન ગેમિંગ કંપનીઓ સામે કડક કાર્યવાહી કરી રહ્યું છે. આ ઓનલાઈન ગેમિંગ વ્યવસાયમાં કેટલીક ભારતીય કંપનીઓ તેમજ કેટલીક વિદેશી કંપનીઓ સામેલ છે. નાણા મંત્રાલયે એક નિવેદનમાં જણાવ્યું હતું કે એવું જોવા મળ્યું છે કે આ કંપનીઓ GST હેઠળ નોંધણી કરાવતી નથી. તેઓ પોતાની આવક છુપાવે છે અને કર ચૂકવતા નથી. તેથી, DGGI એ, ઇલેક્ટ્રોનિક્સ અને માહિતી ટેકનોલોજી મંત્રાલય (MeitY) સાથે મળીને, IT એક્ટ, 2000 ની કલમ 69 હેઠળ કાર્યવાહી કરી અને 357 વેબસાઇટ્સ અને URL ને બ્લોક કર્યા છે.
કરોડો રૂપિયા જપ્ત
કેટલાક ગેરકાયદેસર ગેમિંગ પ્લેટફોર્મ્સ સામે તાજેતરમાં ચલાવવામાં આવેલી ઝુંબેશમાં, DGGI એ I4C અને નેશનલ પેમેન્ટ્સ કોર્પોરેશન ઓફ ઈન્ડિયા (NPCI) સાથે મળીને, ભાગીદારો પાસેથી નાણાં વસૂલવા માટે ઉપયોગમાં લેવાતા બેંક ખાતાઓને નિશાન બનાવ્યા અને ફ્રીઝ કર્યા હતા, જેમાં લગભગ 2,000 બેંક ખાતા અને 4 કરોડ રૂપિયા જપ્ત કરવામાં આવ્યા હતા. બીજી એક કાર્યવાહીમાં, આ ઓફશોર એન્ટિટીઝની વેબસાઇટ પર મળેલા UPI ID સાથે જોડાયેલા 392 બેંક ખાતાઓ પર ડેબિટ ફ્રીઝ મૂકવામાં આવ્યું છે અને આ ખાતાઓમાં રહેલા 122.05 કરોડ રૂપિયાના ભંડોળને કામચલાઉ રીતે જપ્ત કરવામાં આવ્યું છે.
ભારતીય નાગરિકો સામે પણ કાર્યવાહી
DGGI એ ભારતની બહારથી ઓનલાઈન મની ગેમિંગ પ્લેટફોર્મ ચલાવતા કેટલાક ભારતીય નાગરિકો સામે પણ કાર્યવાહી કરી છે. જેમાં જાણવા મળ્યું કે આ લોકો સતગુરુ ઓનલાઈન મની ગેમિંગ પ્લેટફોર્મ, મહાકાલ ઓનલાઈન મની ગેમિંગ પ્લેટફોર્મ અને અભિ 247 ઓનલાઈન મની ગેમિંગ પ્લેટફોર્મ સહિત અનેક ઓનલાઈન પ્લેટફોર્મ દ્વારા ભારતીય ગ્રાહકોને ઓનલાઈન મની ગેમિંગ સુવિધાઓ પૂરી પાડી રહ્યા હતા અને ભારતીય ગ્રાહકો પાસેથી પૈસા એકત્ર કરવા માટે મ્યુલ બેંક ખાતાઓનો ઉપયોગ કરી રહ્યા હતા. DGGI એ અત્યાર સુધીમાં આ પ્લેટફોર્મ સાથે જોડાયેલા 166 મ્યુલ ખાતાઓને બ્લોક કર્યા છે. અત્યાર સુધીમાં આવા ત્રણ લોકોની ધરપકડ કરવામાં આવી છે અને આવા અન્ય લોકો સામે તપાસ ચાલી રહી છે.