દહેરાદૂનઃ આઈસીસી વર્લ્ડ કપમાં પોતાના શાનદાર પ્રદર્શનથી લોકોના દિલમાંવસી જનાર ભારતીય ક્રિકેટર મોહમ્મદ શમી સામાન્ય જીવનમાં તેમની માનવતા માટે ચર્ચા જગાવી રહ્યા છે. ભારતીય પુરૂષ ક્રિકેટ ટીમના ઝડપી બોલર મોહમ્મદ શમીએ 25 નવેમ્બર શનિવારના રોજ નૈનીતાલમાં માર્ગ અકસ્માતમાં ઘાયલ એક વ્યક્તિનો જીવ બચાવ્યો હતો. શમીએ તેમના ઓફિશિયલ ઈન્સ્ટાગ્રામ એકાઉન્ટ પર બચાવનો એક વીડિયો પણ શેર કર્યો છે.
મોહમ્મદ શમીએ પોતાની ઈન્સ્ટા પોસ્ટમાં જણાવ્યું કે, વ્યક્તિની કાર નૈનીતાલના પહાડી રસ્તા પર લપસીને ઢાળ પરથી નીચે પટકાઈ હતી. જ્યારે કાર નીચે પડી ત્યારે શમીની કાર તે વ્યક્તિની પાછળ આવી રહી હતી. તેણે આ આખો અકસ્માત તેની સામે જોયો અને પછી કાર પડતાની સાથે જ તેની કારમાં બેઠેલા અન્ય લોકો સાથે શમી કારમાં સવાર વ્યક્તિઓને બચાવવા માટે બહાર આવ્યો અને પછી અકસ્માતવાળી કારમાંથી લોકોને બહાર કાઢ્યા હતા.
વીડિયોમાં જોઈ શકાય છે કે શમી ઘાયલ વ્યક્તિના હાથ પર પાટો બાંધી રહ્યો છે. શમીએ સફેદ રંગના કપડા અને લાલ રંગની કેપ પહેરી હતી. આ સમય દરમિયાન, ઘણા લોકો સ્થળ પર ઉભા હતા અને એક સફેદ રંગની કાર પણ ઝાડ સાથે અથડાયેલી જોવા મળી રહી છે.
શમીએ વીડિયો શેર કરીને લખ્યું હતું કે, “તે ખૂબ જ નસીબદાર છે, ભગવાને તેને બીજું જીવન આપ્યું. તેની કાર નૈનીતાલ પાસે પહાડી માર્ગ પરથી મારી કારની બરાબર સામે પડી. અમે તેને સુરક્ષિત રીતે બહાર કાઢ્યો. કોઈને બચાવીને હું ખૂબ જ ખુશ છું.”
ભારતીય ક્રિકેટ ટીમના ફાસ્ટ બોલરો ઓસ્ટ્રેલિયા સામે હાલમાં ચાલી રહેલી પાંચ મેચની T20 શ્રેણીમાંથી બહાર થઈ ગયા છે. એવી આશા છે કે શમી ભારતની દક્ષિણ આફ્રિકા સાથેની મેચમાં રમી શકે છે. શમીએ તાજેતરના વર્લ્ડ કપમાં શાનદાર પ્રદર્શન કર્યું છે. તેણે સૌથી વધુ 24 વિકેટ લીધી હતી. વર્લ્ડ કપ પૂરો થયા બાદ તે રજાઓ પર ગયો છે. નૈનીતાલ જતી વખતે શમીએ આ કાર અકસ્માત જોયો અને પછી મદદ માટે આગળ આવ્યો હતો, જેની હવે લોકો ઘણી પ્રશંસા કરી રહ્યા છે.
