Assembly Election: અમારી સરકાર બની તો મનીષ સિસોદિયા હશે નાયબ મુખ્ય પ્રધાનઃ કેજરીવાલે કરી મોટી જાહેરાત

નવી દિલ્હી: દિલ્હી વિધાનસભા ચૂંટણી પ્રચારની વચ્ચે પૂર્વ મુખ્ય પ્રધાન અરવિંદ કેજરીવાલે મોટી જાહેરાત કરી છે. આમ આદમી પાર્ટીના રાષ્ટ્રીય સંયોજક અરવિંદ કેજરીવાલે રવિવારે જંગપુરામાં એક ચૂંટણી રેલીને સંબોધિત કરતી વખતે એક મોટી જાહેરાત કરતાં કહ્યું છે કે દિલ્હીમાં આમ આદમી પાર્ટીની સરકારમાં મનીષ સિસોદિયાને નાયબ મુખ્ય પ્રધાન બનાવવામાં આવશે.

આ પણ વાંચો: ‘…તો હું ચૂંટણી નહીં લડું.’ અરવિંદ કેજરીવાલે ભાજપ અને અમિત શાહને પડકાર ફેંક્યો

મનીષ સિસોદિયા બનશે નાયબ મુખ્ય પ્રધાન
કેજરીવાલે કહ્યું, ‘મનીષ સિસોદિયા મારા સેનાપતિ, નાના ભાઈ અને સૌથી વ્હાલા છે.’ દિલ્હીમાં આમ આદમી પાર્ટીની સરકાર બની રહી છે. બધા કહી રહ્યા છે કે ભલે આમ આદમી પાર્ટીને 2-4 બેઠકો ઓછી મળે તો પણ સરકાર આમ આદમી પાર્ટીની જ બનશે. તેમણે કહ્યું કે આમ આદમી પાર્ટીની સરકારમાં મનીષ સિસોદિયા ફરીથી નાયબ મુખ્ય પ્રધાન બનશે.

અમિત શાહે કર્યો હતો કટાક્ષ
ઉલ્લેખનીય છે કે, એક દિવસ પહેલા જ અમિત શાહે અરવિંદ કેજરીવાલને એક જૂના વચનની યાદ અપાવીને તેમના પર કટાક્ષ કર્યો હતો. કેન્દ્રીય ગૃહમંત્રીએ કહ્યું હતું કે જ્યારે કેજરીવાલે સરકાર બનાવી ત્યારે તેમણે દલિત ચહેરાને દિલ્હીના નાયબ મુખ્ય પ્રધાન બનાવવાનું વચન આપ્યું હતું. દિલ્હીના દલિતો 10 વર્ષથી તેની રાહ જોઈ રહ્યા છે. કેજરીવાલજી પણ જેલમાં ગયા. આ સમય દરમિયાન,દલિતને નાયબ મુખ્ય પ્રધાન બનાવવાની સારી તક હતી પરંતુ તેમણે તેમ ન કર્યું.

બે વિરોધી વિચારધારાઓને સામસામે
અરવિંદ કેજરીવાલે રવિવારે દિલ્હીની ચૂંટણીને રાષ્ટ્રીય ચૂંટણી ગણાવતા કહ્યું હતું કે દિલ્હી વિધાનસભાની ચૂંટણી ફક્ત રાષ્ટ્રીય રાજધાની માટે નહીં પરંતુ સમગ્ર દેશ માટે છે. તેમણે કહ્યું કે આ ચૂંટણીમાં બે વિરોધી વિચારધારાઓ સામસામે ઉભી છે – એક સામાન્ય લોકોના કલ્યાણ પર કેન્દ્રિત છે, બીજી શ્રીમંત વ્યક્તિઓના પસંદગીના જૂથને લાભ આપવા પર.