રાજૌરી (જમ્મુ કાશ્મીર): જમ્મુ-કાશ્મીરના રાજૌરીથી એક મોટા સમાચાર સામે આવી રહ્યા છે, એવું કહેવામાં આવી રહ્યું છે કે આર્મી મેજરે કથિત રીતે તેના અધિકારીઓ પર ગોળીબાર કર્યો છે. આર્મીના એક અધિકારીએ કથિત રીતે ગોળીબાર કર્યો હતો અને આર્મી કેમ્પની અંદર ગ્રેનેડ વિસ્ફોટ કર્યો હતો, જેમાં બે અધિકારીઓ સહિત ઓછામાં ઓછા પાંચ સેનાના જવાન ઘાયલ થયા હતા.
સૂત્રોએ જણાવ્યું કે છેલ્લા ઘણા દિવસોથી કેમ્પમાં ફાયરિંગ પ્રેક્ટિસ ચાલી રહી હતી અને આરોપી અધિકારીએ ગુરુવારે કોઈપણ ઉશ્કેરણી વિના તેના સાથીદારો અને તાબાના કર્મચારીઓ પર ગોળીબાર શરૂ કરી દીધો હતો.
બાદમાં, સૂત્રોએ જણાવ્યું હતું કે, તેણે કેમ્પના શસ્ત્રાગારની અંદર આશ્રય લીધો હતો અને જ્યારે કમાન્ડિંગ ઓફિસર, તેના ડેપ્યુટી અને મેડિકલ ઓફિસર સાથે, તેને આત્મસમર્પણ કરવા માટે સમજાવવાના પ્રયાસમાં બિલ્ડિંગની નજીક પહોંચ્યા, ત્યારે તેણે ગ્રેનેડ ફેંક્યા હતા.
તેમણે કહ્યું કે આરોપીઓ દ્વારા ફેંકવામાં આવેલ ગ્રેનેડ તેમની નજીક વિસ્ફોટ થતાં બે અધિકારીઓ ઘાયલ થયા હતા. ઘાયલોને નજીકની હૉસ્પિટલમાં ભરતી કરવામાં આવ્યા છે, જ્યાં એક અધિકારીની સ્થિતિ નાજુક બતાવવામાં આવી રહી છે. આરોપી અધિકારીને નિયંત્રીત કરવામાં આવ્યો છે. તેની પૂછપરછ કરવામાં આવી રહી છે.
આ ઘટના પર, જમ્મુ સ્થિત સંરક્ષણ પીઆરઓ લેફ્ટનન્ટ કર્નલ સુનિલ બરટવાલે એક સંદેશમાં જણાવ્યું હતું કે, “મને જનરલ એરિયા રાજૌરીમાં આર્મી કેમ્પ પર કેટલાક ફાયરિંગ/આતંકવાદી હુમલા અંગેનો ફોન આવ્યો હતો. જોકે, કોઈ આતંકવાદી હુમલો થયો નથી. કેમ્પમાં આ એક કમનસીબ આંતરિક ઘટના છે.” આ અંગેની તપાસ ચાલી રહી છે.