પીએમ મોદીની બહેન કમલાને ઓળખો છો?
લોકસભાની ચૂંટણી સમાપ્ત થવામાં છે. પહેલી જૂને અંતિમ તબક્કાનું મતદાન છે. આ માટે પીએમ મોદી ઓડિશામાં ચૂંટણીસભાઓ સંબોધિત કરી રહ્યા છે. બુધવારે ઓડિશાના કેન્દ્રપરામાં તેમણે એક ચૂંટણી રેલીને સંબોધિત કરી હતી. આ સમયે તેઓ અહીંની એક સ્થાનિક મહિલા કમલા મહરાણાને પગે પડ્યા હતા, ત્યારે એક ભાવનાત્મક ક્ષણ પણ જોવા મળી હતી. આ ઘટના બાદથી એવી ચર્ચા ચાલી રહી છે કે આ મહિલા કોણ છે? તો આજે અમે તમને એ જણાવીશું. કમલા કચરામાંથી વિવિધ અનન્ય વસ્તુઓ બનાવવા માટે ખૂબ પ્રખ્યાત છે.
કેન્દ્રપરામાં કમલા આંટી તરીકે પ્રખ્યાત કમલા મહરાણા 63 વર્ષના છે. કમલા મહિલા સ્વ-સહાય જૂથ (SHG) ચલાવે છે. આ જૂથ વેસ્ટ મિલ્ક પાઉચ અને અન્ય પ્લાસ્ટિક સામગ્રીને રિસાયક્લિંગ કરીને ઘરની વસ્તુઓ બનાવે છે. તેમણે પીએમ મોદીને વેસ્ટમાંથી બનેલી રાખડી પણ મોકલી હતી. વડાપ્રધાન મોદીએ મન કી બાત કાર્યક્રમની 98મી આવૃત્તિમાં તેમનો ઉલ્લેખ પણ કર્યો હતો અને સ્વચ્છ ભારતના તેમના અભિયાનને પણ બિરદાવ્યું હતું. પીએમ મોદીએ કમલાને તેમની બહેન કહી હતી.
બુધવારે કેન્દ્રપરામાં ચૂંટણી પ્રચાર કરવા ગયેલા પીએમ મોદી કમલા મહરાણાને મળ્યા હતા અને તેમને નમન કર્યા હતા. કમલા એક સ્વ-સહાય જૂથનો ભાગ હોવા ઉપરાંત ‘વેસ્ટ ટુ વેલ્થ’ તેમજ મહિલા સશક્તિકરણ પર કામ કરે છે.
