Statue Of Unity ને જોઇને ખુશ થયા ભૂતાનના રાજા અને વડાપ્રધાન, વિઝીટર બુકમાં લખી આ વાત

એકતા નગર: ભૂતાનના રાજા જિગ્મે ખેસર નામગ્યેલ વાંગચુક અને વડાપ્રધાન શેરિંગ તોબગે હાલ એક પ્રતિનિધિમંડળ સાથે ભારતની મુલાકાતે છે. સોમવારે તેમણે ગુજરાતના એકતા નગરમાં વિશ્વની સૌથી ઊંચી પ્રતિમા ‘સ્ટેચ્યુ ઓફ યુનિટી’ (Statue Of Unity)નિહાળી હતી. ભારતના પ્રથમ ગૃહમંત્રી સરદાર વલ્લભભાઈ પટેલની આ પ્રતિમાની ભવ્યતા જોઈને અને તેની પાછળની પૃષ્ઠભૂમિ સાંભળીને ભૂતાનના રાજા આશ્ચર્યચકિત થઈ ગયા. તેમણે સરદાર સરોવર ડેમની પણ મુલાકાત લીધી હતી અને એકતા નગરના કુદરતી સૌંદર્યથી પ્રભાવિત થયા હતા.

ગરબા પ્રસ્તુતિ સાથે ભવ્ય સ્વાગત

‘સ્ટેચ્યુ ઓફ યુનિટી’ સંકુલ ખાતે ભૂતાનના રાજા અને વડાપ્રધાન સહિત પ્રતિનિધિ મંડળના સભ્યોનું પરંપરાગત ભૂટાની પોશાકમાં સજ્જ થઈને ગુજરાતની ઓળખ સમા ગરબાની રજૂઆત સાથે ભવ્ય સ્વાગત કરવામાં આવ્યું હતું. બાદમાં મહેમાનોએ સંકુલની અંદરના પ્રદર્શનની પણ મુલાકાત લીધી હતી. અહીં માર્ગદર્શકે ભારતની આઝાદી અને ત્યારબાદની ભારતની એકતાની ગાથામાં લોખંડી પુરુષ સરદાર વલ્લભભાઈ પટેલના યોગદાનની વિગતો રજૂ કરી હતી. રાજા અને વડાપ્રધાન મુલાકાતીઓની ગેલેરીમાં પહોંચ્યા અને ત્યાંથી વરસાદ વચ્ચે સરદાર સરોવર ડેમનો નજારો નિહાળ્યો.

ભારતને શુભકામનાઓ

મહેમાનોને ‘સ્ટેચ્યુ ઓફ યુનિટી’ના નિર્માણ પાછળની પૃષ્ઠભૂમિ વિશે સમજાવવામાં આવ્યું હતું. બાદમાં, રાજા જિગ્મે ખેસર નામગ્યેલ વાંગચુકે વિઝિટિંગ બુકમાં તેમના અનુભવની નોંધ કરી, ‘ભારતને શુભેચ્છાઓ અને સંભારણું.’ ભૂતાનના આ સર્વોચ્ચ પ્રતિનિધિમંડળે બાદમાં સરદાર સરોવર ડેમની પણ મુલાકાત લીધી હતી. સરદાર સરોવરને કારણે ગુજરાત રાજ્યમાં પાણીની સમસ્યાના નિરાકરણ અંગે તેમને માહિતગાર કરાયા હતા. આ પછી ભૂટાનના રાજા જિગ્મે ખેસર નામગ્યેલ વાંગચુક અને વડા પ્રધાન શેરિંગ તોબગેને માનભેર વિદાય આપવામાં આવી હતી.

ગુજરાત સરકારના મંત્રીઓ પણ હાજર રહ્યા હતા

આ મુલાકાત દરમિયાન રાજ્યમંત્રી જગદીશ વિશ્વકર્મા, ભૂતાનમાં ભારતીય રાજદૂત સુધાકર દેલા, ભારતમાં ભૂતાનના રાજદૂત મેજર જનરલ વત્સોપ નામગ્યાલ, વિદેશ મંત્રાલયના સંયુક્ત સચિવ અનુરાગ શ્રીવાસ્તવ, SSNNLના વડા મુકેશ પુરી, કલેક્ટર શ્વેતા તેવટિયા, સીઈઓ ઉદિત અગ્રવાલ, જિલ્લા વિકાસ અધિકારી અંકિત પન્નુ, પોલીસ અધિક્ષક પ્રશાંત સુમ્બે ઉપસ્થિત રહ્યા હતા.