વિજયપુરા: કર્ણાટકના વિજયપુરામાં ખાનગી ટ્રેનિંગ વિમાન ક્રેશ થયું છે. આ અકસ્માતના બે લોકો ઘાયલ થયા છે. આ દુર્ઘટના વિજયપુરા જિલ્લાના બાલાસોર તાલુકાના મેંગલોર ગામમાં બની હતી. આ અંગે મળતી પ્રાથમિક માહિતી મુજબ આ ટ્રેનિંગમાં બે લોકો સવાર હતા. દુર્ઘટના બાદ ઘાયલોને 108 મારફતે સારવાર માટે હોસ્પિટલ ખસેડવામાં આવ્યા હતા.
પોલીસની એક ટીમ તાત્કાલિક ઘટના સ્થળે પહોંચી
વિજયપુરાના બાલાસોર પોલીસ સ્ટેશન વિસ્તારમાં બનેલી આ ઘટનાની જાણ થતાં જ બાલાસોર પોલીસની એક ટીમ તાત્કાલિક ઘટના સ્થળે પહોંચી ગઈ હતી. દુર્ઘટનાના કારણ અંગે વધુ માહિતીની રાહ જોવાઈ રહી છે.
એન્જિનમાં ટેકનિકલ સમસ્યા સર્જાઈ
આ ઘટનાની તપાસ કરી રહેલા પોલીસ અધિકારીએ જણાવ્યું હતું કે, આ રેડ બર્ડ એવિએશનની માલિકીનું ખાનગી વિમાન હતું. તે કલબુર્ગીથી બેલાગવી જઈ રહ્યું હતું ત્યારે તેના એક એન્જિનમાં ટેકનિકલ સમસ્યા સર્જાઈ અને તે ક્રેશ થયું. વિમાનમાં બે લોકો સવાર હતા જેમની ઓળખ કેપ્ટન અને એક તાલીમાર્થી પાયલોટ તરીકે થઈ હતી. આ બંનેને ગંભીર ઈજાઓ થઈ છે અને તેમને વધુ સારવાર માટે નજીકની હોસ્પિટલમાં દાખલ કરવામાં આવ્યા છે. આ અંગે વધુ તપાસ ચાલુ છે.
