કર્ણાટકમાં કોંગ્રેસની મુશ્કેલીમાં વધારો, ડીકે શિવકુમારે ધારાસભ્યોના બીજા ગ્રુપને દિલ્હી મોકલ્યું
કર્ણાટકમાં કોંગ્રેસની મુશ્કેલીમાં સતત વધારો થઈ રહ્યો છે. જેમાં સીએમ પદનો વિવાદ હજુ શમ્યો નથી. આ અંગે મળતી માહિતી મુજબ ડીકે શિવકુમાર હજુ પણ નારાજ છે. જેમાં કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે શુક્રવારે બેંગલુરુ આવ્યા હતા પરંતુ ડીકે શિવકુમાર અત્યાર સુધી તેમને મળ્યા નથી. તેમજ મળતી માહિતી મુજબ ધારાસભ્યોના બીજા એક ગ્રુપને ડીકે શિવકુમારે દિલ્હી મોકલ્યું છે.
ઉર્જા મંત્રી કેજે જ્યોર્જની ભૂમિકા ચર્ચામાં
આ રાજકીય ઘટનાક્રમ રાજ્યના ઉર્જા મંત્રી કેજે જ્યોર્જની ભૂમિકા ચર્ચામાં આવી છે. જેમાં ડીકે શિવકુમાર જ્યોર્જના ઘરે ગયા હતા અને સાંજે તેમને મળ્યા હતા. આ મુલાકાત લગભગ એક કલાક ચાલી હતી.જોકે, આ દરમિયાન સિદ્ધારમૈયા જૂથને વિશ્વાસ છે કે મોટાભાગના ધારાસભ્યો તેમના પક્ષમાં છે. તેમજ મુખ્યમંત્રીના પુત્ર અને એમએલસી, ડૉ. યતીન્દ્ર સિદ્ધારમૈયા બે દિવસથી ઉત્તર કન્નડ જિલ્લામાં છે. ત્યાંના દરેક કોંગ્રેસના ધારાસભ્યો સાથે વ્યક્તિગત રીતે મુલાકાત કરી રહ્યા છે.
ડીકે શિવકુમારને માર્ચ સુધી રાહ જોવા અપીલ
જેના પગલે ડીકે શિવકુમાર હાઈ કમાન્ડે આપેલા વચનને પૂર્ણ કરવા માટે દબાણ કરી રહ્યા છે. જેની માટે તેવો તેમના સમર્થક ધારાસભ્યોને છેલ્લા ચાર દિવસથી અલગ અલગ જૂથોમાં દિલ્હી મોકલી રહ્યા છે. રવિવારે બપોરે જ્યારે ખડગેએ આ મુદ્દે પોતાની અસમર્થતા વ્યક્ત કરી ત્યારે 6-7 ધારાસભ્યોના જૂથને મોડી સાંજે દિલ્હી મોકલવામાં આવ્યું હતું, જેમાં આજે કેસી વેણુગોપાલ સાથે મુલાકાતની માંગ કરવામાં આવી હતી.
તેમજ ઉર્જા મંત્રી કેજે જ્યોર્જની બેઠક દરમિયાન પાર્ટી વતી જ્યોર્જે ડીકે શિવકુમારને માર્ચમાં બજેટ રજૂ થાય ત્યાં સુધી શાંત રહેવા વિનંતી કરી હતી.
ડીકે શિવકુમારની નક્કર બાંહેધરીની માંગ
ઉલ્લેખનીય છે કે, ડીકે શિવકુમાર દિલ્હીમાં જયારે ખડગેને મળ્યા હતા ત્યારે તેમને કહેવામાં આવ્યું હતું કે વિધાનસભાનું શિયાળુ સત્ર ડિસેમ્બરમાં બેલાગવીમાં યોજાવાનું છે અને માર્ચમાં રાજ્ય બજેટની તૈયારીઓ શરૂ થશે. આ સમયગાળા દરમિયાન કોઈપણ ફેરફારની સીધી અસર સરકારના કામકાજ પર પડી શકે છે. તેથી બજેટ રજૂ થયા પછી તેમની માંગ પર વિચાર કરવામાં આવશે. જોકે, સૂત્રોએ જણાવ્યું કે ડીકે શિવકુમાર આ બાબતે નક્કર બાંહેધરી માંગી રહ્યા છે.
આપણ વાંચો: નવો શ્રમ કાયદો લાગુ થતા તમારા પગાર અને નોકરીના નિયમોમાં શું ફેરફાર થશે? જાણો અહીં
