મુંબઇઃ IPS ઓફિસર રશ્મિ શુક્લાને બોમ્બે હાઈકોર્ટમાંથી મોટી રાહત મળી છે. બોમ્બે હાઈકોર્ટે રશ્મિ શુક્લા વિરુદ્ધની બે FIR રદ કરી દીધી છે. દેવેન્દ્ર ફડણવીસ જ્યારે મુખ્ય પ્રધાન હતા ત્યારે વિપક્ષી નેતાઓના ગેરકાયદેસર ફોન રેકોર્ડિંગ સામે આ FIR દાખલ કરવામાં આવી હતી. કોર્ટે તેમની સામે દાખલ કરાયેલી બંને FIR રદ કરવાનો આદેશ આપ્યો છે. રશ્મિ શુક્લા સામે એક FIR પુણેમાં અને બીજી મુંબઈના કોલાબા પોલીસ સ્ટેશનમાં નોંધવામાં આવી હતી.
રાજ્યના ગુપ્તચર વિભાગમાં કામ કરતી વખતે રશ્મિ શુક્લા પર દેવેન્દ્ર ફડણવીસના કાર્યકાળ દરમિયાન વિપક્ષી નેતાઓના ફોન ટેપિંગ કરવાનો આરોપ હતો. વિપક્ષી નેતાઓના ફોન ટેપ કરવાના આ મામલામાં ઠાકરે શાસન દરમિયાન એફઆઈઆર દાખલ કરવામાં આવી હતી.
રશ્મિ શુક્લા પર પુણેમાં નાના પટોલે અને મુંબઈમાં સંજય રાઉત અને એકનાથ ખડસેના ફોન ટેપ કરવાનો આરોપ હતો, જેમાં એફઆઈઆર નોંધવામાં આવી હતી. પુણે કેસમાં પોલીસે ક્લોઝર રિપોર્ટ આપ્યો હતો, જ્યારે કોલાબા કેસમાં રાજ્ય સરકારે કેસ આગળ વધારવાનો ઇનકાર કર્યો હતો. આથી કોર્ટે આજે બંને એફઆઈઆર રદ કરવાનો આદેશ કર્યો છે.
જ્યારે શુક્લા સ્ટેટ ઇન્ટેલિજન્સ ડિપાર્ટમેન્ટ (SID)માં કમિશનર હતા, ત્યારે તેમણે ઓગસ્ટ 2020માં એક રિપોર્ટ તૈયાર કર્યો હતો, જેમાં બે વરિષ્ઠ રાજકારણી સામેલ હતા. તેમના અહેવાલમાં કેટલાક ખાનગી વ્યક્તિઓના નામ પણ હતા જેમણે પૈસાના બદલામાં અને બે રાજકારણીઓ સાથેના તેમના નજીકના સંબંધોનો ઉપયોગ કરીને વરિષ્ઠ પોલીસ અધિકારીઓની બદલીઓ અને ઇચ્છિત પોસ્ટિંગ સુરક્ષિત કરવા માટે વચેટિયા તરીકે કામ કર્યું હતું.
