નવી દિલ્હી : કેન્દ્ર સરકાર દ્વારા ઓકટોબર માસમાં જીએસટીના દરોમાં ઘટાડો કર્યો હતો. તેમ છતાં ઓક્ટોબર માસના જીએસટીની આવકમાં વધારો નોંધાયો છે. જેમાં ઓક્ટોબરમાં તહેવારોની ખરીદીને કારણે કુલ જીએસટી કલેક્શન 4.6 ટકા વધીને આશરે રૂપિયા 1.96 લાખ કરોડ થયું. 22 સપ્ટેમ્બરના રોજથી જીવન જરૂરી ચીજ વસ્તુઓથી લઈને ઇલેક્ટ્રોનિક્સ અને ઓટોમોબાઇલ સુધીની કુલ 375 વસ્તુઓ પર જીએસટીના નવા દર લાગુ કરવામાં આવ્યા હતા.આમ, ઓક્ટોબર માસના જીએસટી કલેક્શનના આંકડા તહેવારોમાં વેચાણ અને માંગમાં વધારો થવાની દર્શાવે છે.
આયાત કર 13 ટકા વધીને રૂપિયા 50,884 કરોડ થયો
જોકે, ઓક્ટોબરમાં જીએસટી વસૂલાતમાં વાર્ષિક ધોરણે 4.6 ટકાનો વધારો પાછલા મહિનાઓમાં જોવા મળેલા સરેરાશ 9 ટકાના વધારો કરતાં ઓછો હતો. સ્થાનિક વેચાણની સૂચક કુલ સ્થાનિક આવક ઓક્ટોબરમાં બે ટકા વધીને રૂપિયા 1.45 લાખ કરોડ થઈ. જયારે આયાત કર આશરે 13 ટકા વધીને રૂપિયા 50,884 કરોડ થયો. જીએસટી રિફંડ પણ વાર્ષિક ધોરણે 39.6 ટકા વધીને રૂપિયા 26,934 કરોડ થયો છે. જયારે ઓક્ટોબર 2025માં ચોખ્ખી જીએસટી આવક રૂપિયા 1.69 લાખ કરોડ હતી. જે પાછલા વર્ષની સરખામણીમાં 0.2 ટકાનો વધારો દર્શાવે છે.
આ પણ વાંચો : દેશના જીએસટી કલેકશનના 16. 4 ટકાનો વધારો, ગુજરાત સહિત આ રાજ્યોમાં સૌથી વધુ વૃદ્ધિ
ઓક્ટોબરમાં કુલ જીએસટી કલેક્શન રૂપિયા 1.96 લાખ કરોડ રહ્યું
સરકારી આંકડા અનુસાર, ઓક્ટોબરમાં કુલ જીએસટી કલેક્શન રૂપિયા 1.96 લાખ કરોડ રહ્યું હતું. જે ઓક્ટોબર 2024 માં એકત્રિત કરાયેલા રૂપિયા 1.87 લાખ કરોડથી 4.6 ટકા વધુ છે. આ અગાઉ સપ્ટેમ્બરમાં કુલ જીએસટી કલેક્શન રૂપિયા 1.89 લાખ કરોડ હતું, જ્યારે ઓગસ્ટમાં, જીએસટી કલેક્શન રૂપિયા 1. 86 લાખ કરોડ હતું.
