PM મોદી અને શેખ હસીના 1 નવેમ્બરે આ પ્રોજેક્ટ્સને ફ્લેગ ઓફ કરશે

અગરતલા (ત્રિપુરા) : વડા પ્રધાન નરેન્દ્ર મોદી અને બાંગલાદેશના વડા પ્રધાન શેખ હસીના 1 નવેમ્બરના રોજ વર્ચ્યુઅલ રીતે ભારત અને બાંગલાદેશને જોડતા બે રેલ પ્રોજેક્ટ્સ અને મેગા પાવર પ્લાન્ટનું સંયુક્તપણે ઉદ્ઘાટન કરશે. અધિકારીઓએ રવિવારે જણાવ્યું હતું કે બંને દેશોના વડા પ્રધાનો બાંગલાદેશના ખુલના વિભાગના રામપાલ ખાતે સ્થિત 1320 મેગાવોટ મૈત્રી સુપર થર્મલ પાવર પ્રોજેક્ટનું સંયુક્તપણે ઓનલાઈન ઉદ્ઘાટન કરશે.

આ ઉપરાંત તેઓ 15.064 કિમી લાંબા અખૌડા (બાંગલાદેશના)-અગરતલા (ત્રિપુરા, ભારત) રેલ લિંક પ્રોજેક્ટ અને 86.87 કિમી લાંબા ખુલના-મોંગલા પોર્ટ રેલ લાઇન પ્રોજેક્ટનું પણ ઉદ્ઘાટન કરશે. અખૌરા-અગરતલા રેલ્વે લાઇન ભારતમાં 5.05 કિમી અને બાંગલાદેશમાં 10.014 કિમી છે. બાંગલાદેશના અખૌડા સ્ટેશનને પશ્ચિમ ત્રિપુરાના નિશ્ચિંતપુર ખાતેના આંતરરાષ્ટ્રીય ઈમિગ્રેશન સ્ટેશન દ્વારા બાંગ્લાદેશ સાથે જોડવામાં આવશે.

આ પ્રોજેક્ટનો ખર્ચ નોડલ એજન્સી તરીકે ભારતની નોર્થઇસ્ટ ફ્રન્ટિયર રેલ્વે દ્વારા ઉઠાવવામાં આવ્યો છે. 1,000 કરોડ રૂપિયાના અગરતલા-અખૌડા રેલ્વે પ્રોજેક્ટને જાન્યુઆરી 2010 માં અંતિમ સ્વરૂપ આપવામાં આવ્યું હતું જ્યારે બાંગલાદેશના વડા પ્રધાને તત્કાલિન ભારતીય વડા પ્રધાન મનમોહન સિંહને પ્રોજેક્ટ રજૂ કર્યો હતો. ભારત અને બાંગલાદેશ વચ્ચે પેસેન્જર અને માલસામાનના આદાનપ્રદાન તરીકે અખૌડા-અગરતલા રેલ્વે પ્રોજેક્ટ શરૂ થવાથી ત્રિપુરા, દક્ષિણ આસામ અને મિઝોરમના લોકોને મોટી રાહત મળશે.

હવે અહીંના તમામ લોકોને રેલ દ્વારા કોલકાતા જવા માટે 22 કલાકની બચત થશે. હાલમાં અહીંના લોકોને રેલ દ્વારા કોલકાતા જવા માટે ગુવાહાટી થઈને જવું પડે છે અને તેમાં કુલ 38 કલાકનો સમય લાગે છે. ભારતની નાણાકીય યોજનામાં રામપાલ ખાતે 2 બિલિયન ડોલરના 1320 મેગાવોટના મૈત્રી સુપર થર્મલ પાવર પ્લાન્ટ હેઠળ 560 મેગાવોટના બે એકમોનો સમાવેશ થાય છે. ભારત-બાંગલાદેશ ફ્રેન્ડશિપ પાવર કંપની પ્રાઇવેટ લિમિટેડ પ્રોજેક્ટ એ ભારતના NTPC અને બાંગલાદેશના BPDB વચ્ચેનું સંયુક્ત સાહસ છે.