હૈદરાબાદ : તેલંગાણાના હૈદરાબાદ નજીક પાસુમૈલારામમાં સિગાચી ઇન્ડસ્ટ્રીઝ ફાર્મા પ્લાન્ટમાં થયેલા વિસ્ફોટમાં મૃત્યુઆંક વધીને 34 થયો છે. જ્યારે કાટમાળ દૂર કરતી વખતે અનેક મૃતદેહો મળી આવ્યા છે. જિલ્લા પોલીસ અધિક્ષક પરિતોષ પંકજે જણાવ્યું હતું કે અત્યાર સુધીમાં કાટમાળમાંથી 31 મૃતદેહો મળી આવ્યા છે. જ્યારે હોસ્પિટલમાં સારવાર દરમિયાન ત્રણ લોકોના મોત થયા છે. હાલ બચાવ કામગીરીનો અંતિમ તબક્કો હજુ ચાલુ છે.
આરોગ્ય પ્રધાન સી. દામોદર રાજનરસિંહાએ જણાવ્યું હતું કે, મુખ્યમંત્રી એ. રેવંત રેડ્ડી આજે અકસ્માત સ્થળની મુલાકાત લેશે. આ જીવલેણ અકસ્માત સોમવારે થયો હતો. તેમણે જણાવ્યું કે આ વિસ્ફોટ થયો ત્યારે પ્લાન્ટમાં લગભગ 90 લોકો કામ કરી રહ્યા હતા. વિસ્ફોટ શંકાસ્પદ રાસાયણિક પ્રતિક્રિયાને કારણે થયો હોવાનું કહેવાય છે. જેના કારણે આગ પણ લાગી હતી.
તપાસ બાદ અકસ્માતનું કારણ જાણી શકાશે.
જ્યારે પ્રત્યક્ષદર્શીઓએ જણાવ્યું હતું કે વિસ્ફોટ એટલો શક્તિશાળી હતો કે કેટલાક કામદારો લગભગ 100 મીટર દૂર પડી ગયા હતા. રાજ્યના શ્રમ મંત્રી જી. નરસિંહાએ વિવેક વેંકટસ્વામી સાથે અકસ્માત સ્થળની મુલાકાત લીધી હતી. તેમણે જણાવ્યું હતું કે ટેકનિકલ નિષ્ણાતો દ્વારા તપાસ બાદ અકસ્માતનું કારણ જાણી શકાશે.
મૃતકોના પરિવારજનો માટે 2 લાખ રૂપિયાનું વળતર
વડાપ્રધાન નરેન્દ્ર મોદીએ અકસ્માત પર દુઃખ વ્યક્ત કર્યું અને ઘટનામાં પોતાના પ્રિયજનો ગુમાવનારા લોકો પ્રત્યે સંવેદના વ્યક્ત કરી. તેમણે ઘાયલોને ઝડપથી સ્વસ્થ થવાની કામના કરી. પીએમ મોદીએ X પર એક પોસ્ટમાં, મૃતકોના પરિવારો માટે પ્રધાનમંત્રી રાષ્ટ્રીય રાહત ભંડોળમાંથી 2 લાખ રૂપિયા અને ઘાયલોને 50,000 રૂપિયાનું વળતર આપવાની જાહેરાત કરી છે.
હૈદરાબાદ પ્લાન્ટમાં ઉત્પાદન લગભગ 90 દિવસ માટે બંધ
જ્યારે કંપનીએ કહ્યું કે તે જાનહાનિ પર ખૂબ શોક વ્યક્ત કરે છે અને મૃતકોના પરિવારો પ્રત્યે હૃદયપૂર્વક સંવેદના વ્યક્ત કરે છે. કંપનીએ ભાર મૂક્યો કે યુનિટનો વીમો લેવામાં આવ્યો છે. કંપનીએ અસરગ્રસ્ત લોકોને શક્ય તમામ સહાયની ખાતરી પણ આપી. સિગાચી ઇન્ડસ્ટ્રીઝે એમ પણ કહ્યું કે અસરગ્રસ્ત ઉપકરણો અને માળખાઓને પુનઃસ્થાપિત કરવા માટે તેના હૈદરાબાદ પ્લાન્ટમાં ઉત્પાદન લગભગ 90 દિવસ માટે બંધ રાખવામાં આવશે.સિગાચી ઇન્ડસ્ટ્રીઝ લિમિટેડ એક ફાર્માસ્યુટિકલ કંપની છે.
આ પણ વાંચો…હૈદરાબાદમાં સિગાચી કેમિકલ્સ ફેક્ટરીમાં ટેન્કરમાં બ્લાસ્ટ, 10 લોકોના મોતની આશંકા
