Health: બાળકોને કસરતની સલાહો આપતા પહેલા પુખ્તવયના આ વાંચી લો

આખો દિવસ મોબાઈલમાં પડ્યો રહે છે, બે ડગલા પણ ચાલવું નથી, કસરત તો કરતો જ નથી જેવી કેટલીય સલાહો મમ્મી-પપ્પા કે ઘરના મોટાઓ બાળકને કે કિશોરોને આપતા રહેતા હોય છે. આજના સમયમાં જીવનશૈલીમાં ફેરફાર અને સુવિધાઓને લીધે શારીરિક શ્રમ કે કસરત ઓછા થયા છે, પરંતુ માત્ર બાળકો કે યુવાનોના નહીં, પુખ્ત વયનાઓ પણ શારિરીક શ્રમ કરતા નથી. આવું અમે નહીં પણ એક અહેવાલ જણાવે છે.

ગ્લોબલ હેલ્થ મેગેઝિન લેન્સેટે ભારતીયો મામલે ચોંકાવનારો રિપોર્ટ જાહેર કર્યો છે. આ રિપોર્ટ અનુસાર, લગભગ 50 ટકા પુખ્ત વયના ભારતીય એટલા આળસુ બની ગયા છે કે તેઓ રોજિંદા જીવન માટે જરૂરી ન્યૂનતમ શારીરિક શ્રમ પણ કરતા નથી. આમાં, ભારતીય મહિલાઓની સંખ્યા લગભગ 57 ટકા છે જેઓ શારીરિક રીતે પૂરતી સક્રિય નથી. તે જ સમયે, પુરુષોમાં આ દર 42 ટકા છે.

શારીરિક રીતે પૂરતા સક્રિય ન હોવાના સંદર્ભમાં, દક્ષિણ એશિયામાં મહિલાઓની સંખ્યા પુરુષો કરતાં 14 ટકા વધુ છે. ભારતમાં પણ આ આંકડો લગભગ સમાન છે.

આ પણ વાંચો : Health: Priyanka Chopraનો આ દેશી ઈલાજ થયો વાયરલ, તમે પણ જાણો ફાયદા

ડબ્લ્યુએચઓ અનુસાર, પુખ્ત વયના લોકો શારીરિક રીતે પૂરતા પ્રમાણમાં સક્રિય ન હોવાના સંદર્ભમાં દક્ષિણ એશિયા બીજા ક્રમે છે. પુખ્ત વયના લોકો શારીરિક રીતે સક્રિય ન હોવાના સંદર્ભમાં ઉચ્ચ આવક ધરાવતો એશિયા પેસિફિક પ્રદેશ પ્રથમ ક્રમે છે.

સંશોધકોએ પુખ્ત વયના લોકોનો ડેટા પણ આપ્યો છે જેઓ વૈશ્વિક સ્તરે શારીરિક રીતે પૂરતા સક્રિય નથી. તેમના મતે, વિશ્વભરના એક તૃતીયાંશ પુખ્ત વયના લોકો (31.3 ટકા) થોડો એવો પણ શારીરિક શ્રમ પણ કરતા નથી.

સંશોધન મુજબ, 2010 માં શારીરિક રીતે સક્રિય ન હોય તેવા પુખ્ત વયના લોકોની સંખ્યા 26.4 ટકા હતી. 2022ના આંકડામાં 5 ટકાનો વધારો થયો છે.

2000 માં, લગભગ 22 ટકા ભારતીય પુખ્ત વયના લોકોએ ઓછામાં ઓછો જરૂરી શારીરિક શ્રમ પણ કર્યો નથી. 2010માં આ આંકડો વધીને 34 ટકા થયો હતો. 2022માં આવા લોકોની સંખ્યા વધીને અંદાજે 50 ટકા થઈ જશે.

સંશોધકોના મતે, જો ભારતમાં શારીરિક શ્રમ ન કરતા લોકોની સંખ્યા વધતી રહેશે તો વર્ષ 2030 સુધીમાં આવા લોકોની સંખ્યા વધીને 60 ટકા થઈ જશે. સંશોધકોએ જણાવ્યું હતું કે તેઓએ 2000 થી 2022 સુધીમાં 197 દેશો અને પ્રદેશોમાં અપૂરતી શારીરિક પ્રવૃત્તિના જોખમનો અંદાજ કાઢવા વસ્તી-આધારિત સર્વેક્ષણોમાં પુખ્તો (ઓછામાં ઓછા 18 વર્ષની વયના) દ્વારા નોંધાયેલ શારીરિક પ્રવૃત્તિના ડેટાનું વિશ્લેષણ કર્યું છે. પુખ્ત વયના લોકોની સંખ્યાનો અંદાજ લગાવી શકાય છે.

સંશોધકોએ એ પણ શોધી કાઢ્યું છે કે 60 વર્ષ અને તેથી વધુ ઉંમરના પુરુષો અને સ્ત્રીઓ બંનેમાં વૈશ્વિક સ્તરે શારીરિક નિષ્ક્રિયતાનો દર વધી રહ્યો છે. લોકો શારીરિક રીતે ઓછા સક્રિય હોવાને કારણે, ડાયાબિટીસ અને હૃદય સંબંધિત રોગોનું જોખમ વધી રહ્યું છે. ‘ઈન્ડિયન કાઉન્સિલ ઓફ મેડિકલ રિસર્ચ ઈન્ડિયા ડાયાબિટીસ (ICMR-INDIAB) દ્વારા એક સંશોધન ધ લેન્સેટ જર્નલમાં પ્રકાશિત થયું હતું. આ મુજબ 2021માં ભારતમાં 10.1 કરોડ લોકો ડાયાબિટીસથી પીડિત હતા. હાઈ બીપીથી પીડિત લોકોની સંખ્યા 31.5 કરોડ હતી. આ અભ્યાસ અનુસાર, અંદાજે 25.4 કરોડ લોકો સ્થૂળતાનો શિકાર હતા, જ્યારે 18.5 કરોડ લોકો ઉચ્ચ કોલેસ્ટ્રોલ સાથે સંઘર્ષ કરી રહ્યા હતા.

રોજબરોજના જીવનમાંથી સમય કાઢી સાદી સરળ શારીરિક કસરતો તમને ઘણી બીમારીથી બચાવી શકે છે, તો આજથી જ શરૂ થઈ જાઓ.