અમદાવાદ/નવી દિલ્હીઃ ગુજરાતમાં વેસ્ટર્ન ડિસ્ટર્બન્સના કારણે કમોસમી વરસાદની ગાહી કરવામાં આવી છે. વીજળીના કડાકા સાથે કમોસમી વરસાદનું યલો એલર્ટ આપવામાં આવ્યું છે. વડોદરા, ભરૂચ, અરવલ્લી, ખેડા, આણંદ, પંચમહાલ, દાહોદમાં કમોસમી વરસાદ પડી શકે છે.
અમદાવાદ અને તેની આસપાસના વિસ્તારોમાં આકાશ આંશિક રીતે વાદળછાયું રહેવાની ધારણા છે, જેમાં લઘુત્તમ તાપમાન 19°C ની આસપાસ રહેવાની શક્યતા છે.
લઘુત્તમ તાપમાન સામાન્ય કરતા 5-7°C વધ્યું
સોમવારે સમગ્ર ગુજરાતમાં લઘુત્તમ તાપમાનમાં તીવ્ર ઉછાળો જોવા મળ્યો હતો, જે સામાન્ય કરતા 5-7°C જેટલું ઊંચું નોંધાયું હતું. મોટાભાગના જિલ્લાઓમાં રાત્રિનું તાપમાન સરેરાશ કરતા નોંધપાત્ર રીતે વધારે રહ્યું હતું, જે ફેબ્રુઆરીની શરૂઆતમાં સામાન્ય કરતા વધુ ગરમીનો સંકેત આપે છે. હવામાન વિભાગના ડેટા મુજબ, અમદાવાદમાં લઘુત્તમ તાપમાન 19.5°C નોંધાયું હતું, જે સામાન્ય કરતા 6.1°C વધારે હતું. રાજ્યનું સૌથી નીચું તાપમાન કચ્છના નલિયા માં 12.5°C નોંધાયું હતું.
મહારાષ્ટ્રમાં ધીમે-ધીમે તાપમાન વધશે
મહારાષ્ટ્રના લોકો માટે રાહતના સમાચાર છે. આગામી 3 દિવસ દરમિયાન રાજ્યમાં લઘુત્તમ તાપમાનમાં 2 થી 4 ડિગ્રી સેલ્સિયસનો ધીમે-ધીમે વધારો થવાની સંભાવના છે. ત્યારબાદ તાપમાનમાં કોઈ ખાસ ફેરફારની સંભાવના નથી.
વેસ્ટર્ન ડિસ્ટર્બન્સને કારણે દેશના વાતાવરણમાં સતત ફેરફાર જોવા મળી રહ્યો છે. હવામાન વિભાગના જણાવ્યા અનુસાર, 3 અને 4 ફેબ્રુઆરી 2026 ના રોજ પશ્ચિમ હિમાલયના વિસ્તારોમાં છૂટાછવાયા વરસાદ અને બરફવર્ષાની શક્યતા છે. તેની અસર ખાસ કરીને જમ્મુ-કાશ્મીર, લદ્દાખ, હિમાચલ પ્રદેશ અને ઉત્તરાખંડમાં જોવા મળી શકે છે. ઊંચાઈવાળા વિસ્તારોમાં હિમવર્ષાને કારણે તાપમાનમાં ઠંડક જળવાઈ રહેશે અને કેટલાક સ્થળોએ વાહનવ્યવહાર પ્રભાવિત થઈ શકે છે.
વેસ્ટર્ન ડિસ્ટર્બન્સને કારણે હવામાનમાં થતા ફેરફારો માત્ર પહાડી વિસ્તારો પૂરતા મર્યાદિત રહેશે નહીં. તેના કારણે ઉત્તર-પશ્ચિમ ભારત અને મધ્ય ભારતના નજીકના મેદાની વિસ્તારોમાં અલગ-અલગ સ્થળોએ વરસાદ પડી શકે છે.
આ વિસ્તારોમાં પંજાબ, હરિયાણા, રાજસ્થાનના કેટલાક ભાગો, પશ્ચિમ ઉત્તર પ્રદેશ, મધ્ય પ્રદેશ અને છત્તીસગઢનો સમાવેશ થાય છે. આ વરસાદ પાક માટે અમુક અંશે ફાયદાકારક સાબિત થઈ શકે છે, પરંતુ હવામાન વિભાગે લોકોને ઠંડીથી સાવધ રહેવા જણાવ્યું છે.
ગાઢ ધુમ્મસથી જનજીવન પ્રભાવિત થવાની આશંકા
હવામાન વિભાગે ધુમ્મસ અંગે પણ ચેતવણી જાહેર કરી છે. પંજાબ, હરિયાણા અને ઉત્તર મધ્ય પ્રદેશમાં 3 થી 4 ફેબ્રુઆરી દરમિયાન સવાર અને રાત્રિના સમયે ગાઢ ધુમ્મસ છવાયેલું રહેવાની શક્યતા છે. જ્યારે ઉત્તર પ્રદેશમાં આ સ્થિતિ 5 ફેબ્રુઆરી સુધી યથાવત રહી શકે છે. ધુમ્મસના કારણે રોડ અને રેલ વ્યવહાર પર અસર પડી શકે છે.
તાપમાનમાં મોટા ફેરફારની શક્યતા નથી
આગામી 7 દિવસ દરમિયાન ઉત્તર-પશ્ચિમ, મધ્ય અને પૂર્વ ભારતમાં લઘુત્તમ તાપમાનમાં કોઈ મોટા ફેરફારની શક્યતા નથી. આનો અર્થ એ છે કે ઠંડીની અસર હાલ પૂરતી જળવાઈ રહેશે અને રાત્રિના તાપમાનમાં વધુ ઘટાડો કે વધારો જોવા મળશે નહીં. બિહાર, ઝારખંડ, પશ્ચિમ બંગાળ અને ઓડિશા જેવા પૂર્વી રાજ્યોમાં હવામાનમાં મોટા ફેરફારની શક્યતા નથી.
