હવે ઘરે-ઘરે ‘રામાયણ’ પહોંચાડશે: જાણો કોણ કરશે આ શુભકાર્ય?
મેરઠઃ અભિનેતામાંથી રાજકારણી બનેલા અરુણ ગોવિલે “ઘર-ઘર રામાયણ” હેઠળ રામાયણની નકલોનું વિતરણ કરવા માટે રાષ્ટ્રવ્યાપી ઝૂંબેશ શરૂ કરી હતી. આ અભિયાન અયોધ્યામાં રામ મંદિરના અભિષેકની પ્રથમ વર્ષગાંઠની ઉજવણીના ભાગરૂપે શરૂ કરવામાં આવ્યું હતું.
બુધવારે તેમણે હાપુડમાં રામાયણની નકલોનું વિતરણ કર્યું હતું. આજે આઇકોનિક ટીવી શ્રેણી ‘રામાયણ’માં ‘ભગવાન રામ’ની ભૂમિકા ભજવનારા અને હવે મેરઠથી ભાજપના સાંસદ ગોવિલે મેરઠના કિઠૌર વિધાનસભા મતવિસ્તારમાં બે કાર્યક્રમો યોજ્યા હતા.
એક કાર્યક્રમ હાપુડ રોડ પર ધનોતા ગામમાં લોહિયા ફાર્મહાઉસમાં યોજાયો હતો જ્યારે બીજો કાર્યક્રમ સતકુઆ રોડ પર લાલપુર ગામમાં જિંદાલ વેલ્ડિંગ એસ્ટાબ્લિશમેન્ટમાં યોજાયો હતો. આ કાર્યક્રમમાં બોલતા ગોવિલે કહ્યું હતું કે તેમનો હેતુ પાંચ વર્ષમાં દેશભરમાં રામાયણની 11 લાખ નકલોનું વિતરણ કરવાનો છે.
તેમણે કહ્યું હતું કે “આ અભિયાન શરૂ કરતા પહેલા મેં વડા પ્રધાન નરેન્દ્ર મોદીને પત્ર લખીને તેમની સ્વીકૃતિ માંગી હતી. તેમના સમર્થનથી રામાયણના પવિત્ર ગ્રંથને ભારતના દરેક ઘર સુધી પહોંચાડવા માટે આ અભિયાન શરૂ કરવામાં આવ્યું હતું.
આ પણ વાંચો : અરૂણ ગોવિલને જ્યારે એરપોર્ટ પર મળ્યા મુસ્લિમ ફેન્સ, આવું હતું અભિનેતાનું રિએક્શન
ગોવિલે કહ્યું હતું કે આ અભિયાન રામાયણની શિક્ષા સાથે પરિવારોને ફરીથી જોડવાનો અને ભવિષ્યની પેઢીઓમાં ભારતીય સાંસ્કૃતિક અને આધ્યાત્મિક મૂલ્યોને પ્રોત્સાહન આપવાની દિશામાં એક પગલું છે.