અમરાવતી: એન્ફોર્સમેન્ટ ડિરેક્ટોરેટ (ED) એ આંધ્ર પ્રદેશના ભૂતપૂર્વ મુખ્ય પ્રધાન વાયએસ જગન મોહન રેડ્ડી સામે મોટી કાર્યવાહી કરી છે. EDએ જગન મોહન રેડ્ડીના 27.5 કરોડ રૂપિયાના શેર અને દાલમિયા સિમેન્ટ્સ (ભારત) લિમિટેડ (DCBL) ના અને 377.2 કરોડ રૂપિયાની જમીન જપ્ત (ED action against YS Jagan Mohan Reddy) કરી છે. એક જૂના મની લોન્ડરિંગ કેસ હેઠળ આ કાર્યવાહી કરવામાં આવી છે. જોકે, DCBL નો દાવો છે કે જપ્ત કરાયેલી મિલકતની કુલ કિંમત રૂ. 793.3 કરોડ છે.
વર્ષ 2011માં સેન્ટ્રલ બ્યુરો ઓફ ઈન્વેસ્ટીગેશન(CBI)એ નોંધેલી એક ફરિયાદને આધારે EDએ આ કાર્યવાહી કરી છે. એવો આરોપ છે કે દાલમિયા સિમેન્ટ્સે ભારતી સિમેન્ટ કોર્પોરેશન પ્રાઇવેટ લિમિટેડમાં રોકાણ કર્યું હતું, જે જગન રેડ્ડી સાથે સંબંધિત છે. જગન રેડ્ડીના કાર્મેલ એશિયા હોલ્ડિંગ્સ લિમિટેડ, સરસ્વતી પાવર એન્ડ ઇન્ડસ્ટ્રીઝ પ્રાઇવેટ લિમિટેડ અને હર્ષ ફર્મમાં શેર્સને ED દ્વારા જપ્ત કરવામાં આવ્યા છે.
રેડ્ડી DCBLને લીઝ અપાવી?
EDના જણાવ્યા મુજબ DCBL એ રઘુરામ સિમેન્ટ્સ લિમિટેડમાં 95 કરોડ રૂપિયાનું રોકાણ કર્યું હતું, જેનું પ્રતિનિધિત્વ જગન રેડ્ડી કરી રહ્યા હતા. બદલામાં, જગન રેડ્ડીએ તેમના પિતા અને તત્કાલીન મુખ્ય પ્રધાન વાયએસ રાજશેખર રેડ્ડીની વગનો કથિત રીતે ઉપયોગ કરીને DCBLને કડપ્પા જિલ્લામાં 407 હેક્ટર જમીનની ખાણકામ લીઝ આપવામાં આવી.
આપણ વાંચો: ભારતીયો માટે ગર્વની ક્ષણ: ભગવદ ગીતા અને નાટ્યશાસ્ત્રનો યુનેસ્કોની આ યાદીમાં સામેલ
ED અને CBIના જણાવ્યા અનુસાર, જગન રેડ્ડી, ભૂતપૂર્વ સાંસદ વી વિજયા સાઈ રેડ્ડી અને DCBLના પુનિત ડેલમિયા વચ્ચેના કરાર હેઠળ રઘુરામ સિમેન્ટ્સ લિમિટેડના શેર ફ્રેન્ચ કંપની PARFICIM ને 135 કરોડ રૂપિયામાં વેચવામાં આવ્યા હતા. આમાંથી, મે 2010 અને જૂન 2011 વચ્ચે હવાલા દ્વારા જગનને 55 કરોડ રૂપિયા રોકડમાં આપવામાં આવ્યા હતા. આવકવેરા વિભાગ દ્વારા જપ્ત કરાયેલા દસ્તાવેજોમાં આ ચુકવણીઓની વિગતો મળી આવી હતી.