નવી દિલ્હી : દેશની 18મી લોકસભાની(Loksabha)રચના બાદ રાષ્ટ્રપતિ દ્રૌપદી મુર્મુએ(Draupadi Murmu) બંને ગૃહોને સંબોધિત કર્યા. આ દરમિયાન તેમણે જણાવ્યું કે આવનારા સમયમાં કયા વિષયો સરકારની પ્રાથમિકતા રહેશે. આ દરમિયાન તેમણે લોકશાહીના રક્ષણ, ખેડૂતોની આવક અને દેશની અર્થવ્યવસ્થા વિશે પણ વાત કરી હતી. તેમણે પોતાના ભાષણમાં પેપર લીક, પૂર્વોત્તર અને નાગરિકતા સંશોધન કાયદાનો પણ ઉલ્લેખ કર્યો હતો.
64 કરોડ મતદારોએ ઉત્સાહ સાથે ફરજ બજાવી
આ વિશ્વની સૌથી મોટી ચૂંટણી હતી. લગભગ 64 કરોડ મતદારોએ ઉત્સાહ સાથે તેમની ફરજ બજાવી છે. આ વખતે પણ મહિલાઓએ ઉત્સાહપૂર્વક મતદાનમાં ભાગ લીધો છે. જમ્મુ-કાશ્મીરમાંથી પણ આ ચૂંટણીની ખૂબ જ સુખદ તસવીર જોવા મળી.કાશ્મીર ખીણમાં દાયકાઓ બાદ મતદાનનો રેકોર્ડ તૂટી ગયો.
બજેટમાં અનેક ઐતિહાસિક પગલાઓ પણ જોવા મળશે
છ દાયકા બાદ દેશમાં પૂર્ણ બહુમતીવાળી સ્થિર સરકાર બની છે. લોકોએ આ સરકારમાં ત્રીજી વખત વિશ્વાસ દર્શાવ્યો છે. લોકો આ અંગે જાગૃત છે. આ સરકાર તેમની આકાંક્ષાઓ પૂરી કરી શકે છે. 18મી લોકસભા ઘણી રીતે ઐતિહાસિક લોકસભા છે. આ લોકસભાની રચના અમૃતકાળના શરૂઆતના વર્ષોમાં થઈ હતી. આ સરકાર આગામી સત્રમાં આ કાર્યકાળનું પ્રથમ બજેટ રજૂ કરવા જઈ રહી છે. આ બજેટ સરકારની મોટી આર્થિક અને દૂરગામી નીતિઓ તેમજ ભવિષ્યવાદી અભિગમનો અસરકારક દસ્તાવેજ બની રહેશે. આ બજેટમાં અનેક ઐતિહાસિક પગલાઓ પણ જોવા મળશે.
રોજગારની તકો વધારી
સુધારા, પ્રદર્શન અને પરિવર્તનના સંકલ્પે ભારતને આજે વિશ્વમાં સૌથી ઝડપથી વિકસતું અર્થતંત્ર બનાવ્યું છે. મારી સરકાર અર્થવ્યવસ્થાના ત્રણેય સ્તંભોને સમાન મહત્વ આપી રહી છે. ઉત્પાદન, સેવાઓ અને કૃષિ. PLI યોજનાઓ અને વ્યવસાય કરવાની સરળતા મોટા પાયે રોકાણ અને રોજગારની તકો વધારી રહી છે. પરંપરાગત ક્ષેત્રોની સાથે અન્ય ક્ષેત્રોને પણ મિશન મોડ પર પ્રોત્સાહન આપવામાં આવી રહ્યું છે.
એમએસપીમાં પણ રેકોર્ડ વધારો કર્યો
મારી સરકારે પીએમ કિસાન સન્માન નિધિ હેઠળ દેશના ખેડૂતોને 3.20 લાખ કરોડ રૂપિયા આપ્યા છે. મારી સરકારના નવા કાર્યકાળની શરૂઆતથી અત્યાર સુધીમાં 20,000 કરોડ રૂપિયાથી વધુ ખેડૂતોને ટ્રાન્સફર કરવામાં આવ્યા છે. સરકારે ખરીફ પાક માટે એમએસપીમાં પણ રેકોર્ડ વધારો કર્યો છે.
પેપર લીક ઘટનામાં કડક કાર્યવાહી કરવામાં આવશે
દેશના યુવાનોને તેમની પ્રતિભા દર્શાવવા માટે પૂરતી તકો મળે તે સુનિશ્ચિત કરવાનો સરકારનો સતત પ્રયાસ છે. મારી સરકાર પેપર લીકની તાજેતરની ઘટનાઓની નિષ્પક્ષ તપાસ કરવા તેમજ ગુનેગારોને કડક સજા આપવા માટે પ્રતિબદ્ધ છે. આ પહેલા પણ, અમે પેપર લીકની ઘટનાઓ જોઈ છે, આના માટે એક નક્કર ઉકેલની જરૂર છે, પક્ષીય રાજકારણથી ઉપર ઉઠીને સંસદે પરીક્ષાઓમાં ગેરરીતિઓ સામે કડક કાયદો બનાવ્યો છે.
ગરીબો, યુવાનો, મહિલાઓ અને ખેડૂતો સશક્ત થાય
ભારતનું નિર્માણ ત્યારે જ શક્ય છે જ્યારે દેશના ગરીબો, યુવાનો, મહિલાઓ અને ખેડૂતો સશક્ત થાય. તેથી જ મારી સરકાર તેમને સર્વોચ્ચ પ્રાથમિકતા આપી રહી છે. અમારો ઉદ્દેશ્ય તેમને દરેક સરકારી યોજનાનો લાભ આપવાનો છે. ભારત આ ઈચ્છા સાથે કામ કરી રહ્યું છે. એક પણ વ્યક્તિ સરકારી યોજનાઓથી વંચિત ન રહેવી જોઈએ, છેલ્લા 10 વર્ષમાં મારી સરકાર વિકલાંગ ભાઈઓ અને બહેનો માટે સસ્તું અને સ્વદેશી સહાયક ઉપકરણો વિકસાવી રહી છે અને સ્વચ્છ ભારત અભિયાનમાં ગરીબોના જીવનની ગરિમાના પ્રયાસોથી આપણને એ વાતનો અહેસાસ થાય છે દેશ ખરેખર મહાત્મા ગાંધીના આદર્શોને પાળી રહ્યો છે.
કટોકટીએ બંધારણ પર સીધો હુમલો
દેશમાં બંધારણ લાગુ થયા બાદ પણ અનેક વખત બંધારણ પર પ્રહારો થયા છે. આજે 27મી જૂન છે, 25મી જૂન 1975ના રોજ લાદવામાં આવેલી કટોકટી એ બંધારણ પર સીધા હુમલાનો સૌથી મોટો અને કાળું પ્રકરણ હતું. આખા દેશમાં હોબાળો થયો પરંતુ દેશે આવી ગેરબંધારણીય શક્તિઓ પર વિજય મેળવ્યો. કારણ કે ભારતના મૂળમાં ગણતંત્રની પરંપરાઓ રહી છે.
સંરક્ષણ નિકાસ 18 ગણી વધીને 21,000 કરોડ રૂપિયા
રાષ્ટ્રપતિ દ્રૌપદી મુર્મુએ કહ્યું કે મજબૂત ભારત માટે આપણા સશસ્ત્ર દળોમાં આધુનિકતા જરૂરી છે. યુદ્ધની પરિસ્થિતિમાં શ્રેષ્ઠ બનવા માટે સશસ્ત્ર દળોમાં સુધારાની પ્રક્રિયા ચાલુ રાખવી જોઈએ. આ વિચારને ધ્યાનમાં રાખીને મારી સરકારે છેલ્લા 10 વર્ષમાં ઘણા મહત્વપૂર્ણ પગલાં લીધા છે. છેલ્લા એક દાયકામાં આપણી સંરક્ષણ નિકાસ 18 ગણી વધીને 21,000 કરોડ રૂપિયા થઈ ગઈ છે.
Also Read –
