Delhi Police કેન્દ્રીય ગૃહ મંત્રી અમિત શાહ સાથે બેઠક બાદ એક્શનમાં…

નવી દિલ્હી : દિલ્હી પોલીસ(Delhi Police)સંગઠિત ગુનાઓ પર નિયંત્રણ લાવવા અને ભારત અને વિદેશની જેલમાં બંધ ગેંગસ્ટરો પર નજર રાખવાના પ્રયાસોને વધુ તીવ્ર બનાવવાની યોજના બનાવી રહી છે. કેન્દ્રીય ગૃહમંત્રી અમિત શાહે કાયદો અને વ્યવસ્થા અંગે ઉચ્ચ સ્તરીય સમીક્ષા બેઠક યોજી તેના એક દિવસ પછી શનિવારે દિલ્હી પોલીસ મુખ્યાલય ખાતે ઉચ્ચ પોલીસ અધિકારીઓની બેઠક યોજાઈ હતી. ગૃહમંત્રી અમિત શાહની અધ્યક્ષતામાં યોજાયેલી બેઠકમાં દિલ્હીના મુખ્યમંત્રી રેખા ગુપ્તા, દિલ્હીના ગૃહમંત્રી આશિષ સૂદ અને કેન્દ્રીય ગૃહ સચિવ ગોવિંદ મોહન પણ હાજર રહ્યા હતા.

Also read : વડા પ્રધાન મોદીએ રમઝાનની શુભેચ્છાઓ પાઠવી; રાહુલ ગાંધી અને પ્રિયંકા ગાંધીએ એ પણ પોસ્ટ કરી

ગુનેગારોની યાદી તૈયાર કરવામાં આવશે

આ સમીક્ષા બેઠક રાષ્ટ્રીય રાજધાનીમાં ગુનાખોરીને ડામવા પોલીસ વ્યૂહરચનાઓ મજબૂત બનાવવા પર કેન્દ્રિત હતી. સૂત્રોના જણાવ્યા અનુસાર શનિવારની બેઠકમાં નિર્ણય લેવામાં આવ્યો હતો કે નવા ગુનેગારોની યાદી તૈયાર કરવામાં આવશે અને તેમના નેટવર્કને તોડી પાડવા માટે પગલાં લેવામાં આવશે.

સૂત્રોના જણાવ્યા અનુસાર, જેલમાં રહેલા કૌશલ ચૌધરી અને નીરજ બવાના જેવા ગેંગસ્ટરો પર કડક દેખરેખ રાખવામાં આવશે. આ અનમોલ બિશ્નોઈ, અર્શ ડલ્લા, ગોલ્ડી બ્રાર, હિમાંશુ ભાઉ, લકી પટિયાલ, જગ્ગા ધુરકોટ, વીરેન્દ્ર ચરણ, અમરદીપ બિશ્નોઈ, નોની રાણા, મહેન્દ્ર સહારણ , રાહુલ, મહેન્દ્ર મેઘવંશી અને નવીન બોક્સર સહિત વિદેશથી નેટવર્ક ચલાવતા લોકો પર બાજ નજર રાખવામાં આવશે.

ગેંગસ્ટરને મદદ કરનારાઓ પોલીસના રડાર પર

આ ઉપરાંત એક વરિષ્ઠ પોલીસ અધિકારીએ જણાવ્યું હતું કે ગુનાહિત રેકોર્ડ ધરાવતા સગીરો અને ગુનેગારો સાથે પ્રત્યક્ષ કે પરોક્ષ સંપર્કમાં રહેલા લોકો પર પણ નજર રાખવામાં આવશે. તેમણે કહ્યું કે પોલીસ જઘન્ય ગુનાઓમાં સંડોવાયેલા સગીરોની યાદી તૈયાર કરી રહી છે અને તેમના પર પુખ્ત વયના લોકોની જેમ કેસ ચલાવવા માટે કોર્ટને ભલામણ કરશે. ગેરકાયદેસર પ્રવૃત્તિઓ પર નજર રાખવા માટે અધિકારીઓ ગેંગસ્ટરો અને તેમના સહયોગીઓના સોશિયલ મીડિયા પ્રોફાઇલ પર નજર રાખશે. અધિકારીએ કહ્યું, ગુનેગારોને મદદ કરનારા લોકો પોલીસના રડાર પર હશે. તેમની ગતિવિધિઓ પર નજીકથી નજર રાખવામાં આવશે.

શહેરમાં પેટ્રોલિંગ વધારવામાં આવશે

બેઠકમાં, દિલ્હી પોલીસ કમિશનર, વિવિધ ઝોનના સ્પેશિયલ પોલીસ કમિશનર (કાયદો અને વ્યવસ્થા), 15 પોલીસ જિલ્લાઓના સંયુક્ત કમિશનર અને ડેપ્યુટી પોલીસ કમિશનર અને વિવિધ એકમોના ડેપ્યુટી પોલીસ કમિશનર સહિત ઉચ્ચ પોલીસ અધિકારીઓએ અમલમાં મુકવામાં આવનાર સુરક્ષા પગલાં અંગે ચર્ચા કરી. મુખ્ય ધ્યાન કેન્દ્રિત ક્ષેત્રોમાં ગેરકાયદેસર સ્થળાંતર કરનારાઓ પર કાર્યવાહી, શેરી ગુનાઓ અટકાવવા, મહિલાઓની સલામતી સુનિશ્ચિત કરવા અને સંગઠિત ગુનાહિત નેટવર્કનો સામનો કરવાનો સમાવેશ થાય છે. રાષ્ટ્રીય અને આંતરરાષ્ટ્રીય ડ્રગ સપ્લાય ચેઇનને તોડવાના પ્રયાસોની પણ ચર્ચા કરવામાં આવી હતી.

Also read : હરિયાણામાં કોંગ્રેસની 23 વર્ષીય મહિલા કાર્યકર્તાનો મૃતદેહ સુટકેસમાંથી મળી આવતા રાજકીય ખળભળાટ

દરેક ખૂણામાં પેટ્રોલિંગ વધારવામાં આવશે

એક વરિષ્ઠ પોલીસ અધિકારીએ જણાવ્યું હતું કે, છેડતી અને લૂંટની ઘટનાઓને રોકવા માટે શહેરના દરેક ખૂણામાં પેટ્રોલિંગ વધારવામાં આવશે. વરિષ્ઠ નાગરિકો અને બાળકોની સલામતી પર ખાસ ભાર મૂકવામાં આવશે. પોલીસ સ્ટેશનોને તેમની સાથે વધુ અસરકારક સંદેશાવ્યવહાર ચેનલો સ્થાપિત કરવા સૂચના આપવામાં આવશે.