Delhi સીએમ આવાસ PWD એ કેમ સીલ કર્યું, જાણો સમગ્ર મામલો

નવી દિલ્હી : દિલ્હીમાં(Delhi)સીએમ આવાસને લઇને રાજકીય હલચલ તેજ છે. જેમાં મુખ્યમંત્રીના સત્તાવાર આવાસને ગેરકાયદે ઉપયોગના આરોપમાં સીલ કરી દેવામાં આવ્યું છે. PWDએ આ કાર્યવાહી કરી છે. PWDએ 6 ફ્લેગ સ્ટાફ રોડ સ્થિત મુખ્યમંત્રી આવાસને સીલ કરી દીધું છે. તેના ગેટ પર ડબલ લોક લગાવવામાં આવ્યું છે. તાજેતરમાં જ અરવિંદ કેજરીવાલે મુખ્યમંત્રી પદ પરથી રાજીનામું આપીને આ સરકારી આવાસ ખાલી કરી દીધું હતું. સીએમ બન્યા બાદ આતિશી તેમાં શિફ્ટ થઈ ગયા છે. જેમાં આવાસ ખાલી કરવા અને તેના હેન્ડઓવરને લઈને વિવાદ છે. જેના પછી PWDએ કાર્યવાહી કરી છે.

ભ્રષ્ટાચારનો શીશમહેલ સીલ : ભાજપ

આ નિવાસસ્થાન સીલ કરવામાં આવ્યા બાદ દિલ્હી ભાજપના પ્રદેશ અધ્યક્ષ વીરેન્દ્ર સચદેવાએ કહ્યું હતું કે, “અરવિંદ કેજરીવાલ, તમારા પાપનો ઘડો આખરે ભરાઈ ગયો છે. આખરે, તમારા ભ્રષ્ટ શીશ મહેલને સીલ કરવામાં આવ્યું છે. આજે સવારે જ ભાજપે માંગ કરી હતી કે, ભ્રષ્ટાચારી શીશ મહેલને સીલ કરી દેવો જોઈએ. જેનો સેક્શન પ્લાન પાસ થયો ન હતો, જેને કમ્પ્લીશન સર્ટિફિકેટ મળ્યું ન હતું, તમે તેમાં કેવી રીતે રહેતા હતા. તમે ચોર દરવાજાથી ખડાઉ મુખ્યમંત્રીને ઘુસાડવા માંગો છો. તે બંગલાની અંદર શું રહસ્યો છુપાયેલા હતા. તમે સરકારી વિભાગને ચાવી સોંપ્યા વિના નિયમોનું ઉલ્લંઘન કરીને પ્રવેશવાનો પ્રયાસ કરી રહ્યા હતા. આખી દિલ્હી જાણે છે કે બંગલો તમારા કબજામાં હતો.

ભાજપ સીએમ આવાસ કબજે કરવા માંગે છે

આ કાર્યવાહીને લઈને દિલ્હીના મુખ્યમંત્રી કાર્યાલયે નિવેદન આપ્યું છે. મુખ્યમંત્રી કાર્યાલયે કહ્યું, “દેશના ઈતિહાસમાં પહેલીવાર મુખ્યમંત્રી આવાસ ખાલી કરવામાં આવ્યું છે. ભાજપના ઈશારે લેફ્ટનન્ટ ગવર્નરે જબરદસ્તીથી મુખ્યમંત્રી આતિશીનો સામાન સીએમ આવાસમાંથી બહાર કાઢ્યો હતો. એલજી વતી ભાજપના કોઈ મોટા નેતાને સીએમ આવાસ ફાળવવાનો નિર્ણય તો નથીને તૈયારીઓ ચાલી રહી છે. 27 વર્ષથી દિલ્હીમાં વનવાસ ભોગવી રહેલી ભાજપ હવે સીએમ આવાસ કબજે કરવા માંગે છે.

ભાજપ અને AAPના આક્ષેપો અને પ્રતિઆક્ષેપો

વાસ્તવમાં દિલ્હી ભાજપના પ્રદેશ અધ્યક્ષ વીરેન્દ્ર સચદેવાએ મુખ્યમંત્રીના સત્તાવાર નિવાસસ્થાનને જપ્ત કરવાની માંગ કરી હતી. ભાજપે માંગણી કરી છે કે જાહેર બાંધકામ વિભાગ 6 ફ્લેગ સ્ટાફ રોડ સ્થિત શીશમહેલ બંગલાને તાત્કાલિક સીલ કરે, તેનો સંપૂર્ણ સર્વે કરે અને વીડિયો રિપોર્ટ જનતા સમક્ષ મૂકે. વીરેન્દ્ર સચદેવાએ કહ્યું કે આ શીશમહલ બંગલા વિશે બધા જાણે છે કે અરવિંદ કેજરીવાલે તેને ગેરકાયદે બનાવ્યો હતો. ન તો તેનો નકશો માન્ય છે કે ન તો તેની પાસે કોઈ પૂર્ણતા પ્રમાણપત્ર (CC)છે. આવી સ્થિતિમાં, આ બંગલો આગળ ફાળવવો કે નહીં તે નક્કી કરવાનો અધિકાર જાહેર બાંધકામ વિભાગને છે.

સીએમ આતિશી સોમવારથી બંગલામાં રહેવા લાગી હતી.

જ્યારે દિલ્હીના મુખ્યમંત્રી આતિશીના નિવાસ સ્થાને શિફ્ટ થયા પછી આમ આદમી પાર્ટીએ બુધવારે આરોપ લગાવ્યો હતો કે તે હજુ સુધી તેમને ફાળવવામાં આવ્યું નથી. AAP એ ભાજપ પર બંગલો હડપ કરવાનો પ્રયાસ કરવાનો આરોપ લગાવ્યો. પૂર્વ મુખ્યમંત્રી અરવિંદ કેજરીવાલે બંગલો ખાલી કર્યા બાદ સીએમ આતિશી સોમવારથી બંગલામાં રહેવા લાગી હતી.